58:142  estre  trouve  bon:  mais  il  avoit  este  enseigne,  que  lui  estant  povre  pecheur,  ne  devoit  pas  presumer  d'invoquer  le  Nom  de  Dieu,  sinon  d'autant  qu'il  mettoit  sa  fiance  en  celui  qui  devoit  estre  envoie  pour  purger  les  pechez  du  monde,  et  pour  en  faire  la  satisfaction.  Les  Paiens  ont  bien  eu  leurs  autels,  et  ont  sacrifie  comme  les  saincts  Peres:  mais  le  principal  leur  a  defailli.  Ils  se  sont  amusez  a  la  ceremonie,  laquelle  estoit  frivole  de  soy:  d'autant  qu'ils  n'ont  pas  regarde  a  ce  patron  celeste,  duquel  il  est  parle  au  Levitique.  Ainsi  donc,  nous  avons  a  retenir,  que  nostre  pere  Isaac  voulant  invoquer  le  Nom  de  Dieu,  a  eu  l'autel  pour  tesmoignage  que  il  ne  pouvoit  estre  receu  sinon  au  Nom  et  en  faveur  de  nostre  Seigneur  Iesus  Christ,  Et  pourtant  auiourd'hui,  toutesfois  et  quantes  que  nous  voudrons  prier  Dieu,  apprenons  d'arouser  nos  prieres  du  sang  de  nostre  Seigneur  Iesus  Christ:  car  autrement  elles  seront  profanes  et  pollues:  mais  quand  le  sang  de  nostre  Seigneur  Iesus  Christ  viendra  la,  il  est  certain  que  nos  prieres  seront  pures,  elles  seront  dediees,  en  sorte  que  Dieu  les  aura  pour  agreables.  Et  quand  nous  invoquerons  Dieu  un  chacun  au  secret  de  son  coeur,  que  nous  taschions  aussi  d'attirer  nos  prochains,  afin  qu'il  soit  glorifie  au  milieu  de  nous  d'un  commun  accord.  Et  comme  nous  devons  estre  unis  en  loy,  aussi  que  nous  n'aions  qu'une  mesme  bouche,  pour  protester  que  nous  le  tenons  pour  nostre  Pere  et  Sauveur  et  que  nous  sommes  du  tout  a  lui.  Or  nous-nous  prosternerons  devant  la  Maieste  de  nostre  bon  Dieu  en  cognoissance  de  nos  fautes,  le  priant  qu'il  lui  plaise  nous  les  faire  tellement  sentir,  que  ce  soit  pour  nous  y  desplaire:  et  pour  gemir  devant  son  Siege  iudicial,  afin  d'estre  absous  par  sa  misericorde  :  d'autant  que  nous  serions  a  bon  droict  condamnez  par  son  iugement.  Et  qu'il  lui  plaise  nous  fortifier,  tellement  que  nous  ne  defaillions  point,  quelques  povretez  que  nous  aions  a  souffrir  en  ce  monde:  mais  que  nous  meditions  tellement  sa  Parole,  que  la  seule  promesse  qu'il  nous  a  donnee,  de  nous  tenir  pour  ses  enfans  nous  contente  et  que  nous  en  soions  munis,  afin  de  nous  assuiettir  a  sa  bonne  volonte,  pour  porter  paisiblement  toutes  les  afflictions  qu'il  nous  envoiera:  et  que  nous  le  glorifions  aussi  en  nos  coeurs  sans  feintise,  ni  hipocrisie  aucune  :  et  qu'aussi  devant  les  hommes  nous  taschions  de  monstrer  les  fruits  de  nostre  Foy,  et  que  par  ce  moien  il  soit  honore  de  tous,  et  de  grans  et  de  petis.  Que  non  seulement  il  nous  face  ceste  grace,  mais  aussi  a  tous  peuples  et  nations  de  la  terre,  etc.