50:140  me  colaphis  caederet.  Qua  loquutione  eleganter  exprimit  se  in  ordinem  fuisse  redactum.  Est  enim  atrox  contumeliae  genus  colaphis  caedi.  Ideo  si  cui  facies  est  sugiilata,  is  prae  pudore  in  hominum  conspectum  prodire  non  audet.  Ita  quacunque  infirmitate  laboremus,  meminerimus  nos  tanquam  co-  Iapho  caedi  a  Domino,  ad  irrogandum  nobis  pudorem,  quo  humilitatem  discamus.  Hoc  praesertim  in  meditata  habeant  qui  alioqui  praestant  eximiis  virtutibus:  si  qua  habeant  admista  vitia,  si  quibus  odiis  impetantur,  si  quibus  sugillentur  maledictis:  non  tantum  ferulas  esse  coelestis  magistri,  sed  colaphos,  qui  verecundiam  incutiant  et  retundant  omnem  ferociam.  Huc  porro  attendant  omnes  pii,  quantum  sit  superbiae  venenum  (quemadmodum  dicit  Augustinus  sermone  De  verbis  apostoli  tertio)  quod  non  potest  nisi  veneno  curari.  Et  certe  sicuti  humani  exitii  causa  fuit:  ita  extremum  est  vitium,  quocum  pugnandum  nobis  est.  Nam  reliqua  in  malefactis  locum  habent,  hoc  vero  in  optimis  operibus  timendum  est.  Deinde  ita  pertinaciter  inhaeret  nobis  a  natura,  ita  penitus  infixum  est,  ut  difficilime  revellatur.  Consideremus  diligenter  quis  hic  loquatur.  Vicerat  tot  pericula,  tormenta  et  alia  mala  :  triumphum  de  omnibus  Christi  hostibus  egerat:  expulerat  mortis  timorem:  mundo  denique  renuntiaverat:  necdum  tamen  subegerat  penitus  superbiam.  Imo  adeo  anceps  illi  certamen  restabat,  ut  vincere  non  posset  nisi  colaphis  caesus.  Huius  exemplo  edocti,  ita  bellum  geramus  cum  aliis  vitiis,  ut  praecipuam  vim  conferamus  ad  hoc  debellandum.  Sed  quid  sibi  vult  quod  Satan,  qui  homicida  fuit  ab  initio,  Pauli  fuit  medicus?  neque  modo  in  curando  corpore,  sed,  quod  maius  est,  in  anima  sananda?  Respondeo,  Satanam  pro  ingenio  moreque  suo  non  aliud  quam  necandi  perdendique  consilium  agitasse:  et  aculeum,  cuius  meminit  Paulus,  letali  veneno  fuisse  tinctum:  sed  hoc  singulare  fuisse  beneficium  Domini,  quod  natura  exitiale  erat,  in  medicinam  vertere.  8.  Super  hoc  ter  Dominum.  Ter  hic  quoque  pro  frequenti  repetitione  sumitur.  Significare  autem  vult  vexationem  hanc,  quam  saepe  fuerit  deprecatus,  sibi  fuisse  molestam.  Nam  si  levis  fuisset  aut  facilis  toleratu,  non  adeo  optasset  ab  ea  liberari.  Dicit  tamen  se  non  impetrasse:  unde  patet  quam  necesse  habuerit  humiliari.  Confirmat  igitur  quod  superius  dixit,  retentum  se  fuisse  hoc  fraeno,  ne  insolesceret.  Nam  si  utilis  fuisset  liberatio,  nunquam  repulsam  esset  passus.  Terum  inde  sequi  videtur,  Paulum  nequaquam  ex  fide  orasse,  nisi  velimus  irritas  facere  omnes  Dei  promissiones.  Passim  audimus  in  scriptura,  nos  quidquid  ex  fide  petierimus,  impetraturos:  Paulus  orat,  neque  obtinet.  Respondeo,  sicuti  petendi  ratio  est  diversa,  sic  duo  esse  genera  impretrandi.  Petimus  simpli-