30:140  oportebat  ipsum  sine  contradictione  Dei  mandatis  quae  Samuel  pertulerat  obtemperare.  Hinc  itaque  discamus  non  satisfacere  iudices  officio  suo,  si  crimen  aliquod  gravioribus  poenis  dignum  lenioribus  puniant,  sed  oportere  punitionem  offensae  respondere.  Si  quis  enim,  exempli  gratia,  quopiam  admisso  delicto  puniatur  severiore  poena:  et  alter  eiusdem  criminis  reus  leviore  mulctetur,  nulla  potest  in  illa  inaequalitate  esse  iustitia.  Quamobrem  quo  proclivius  in  hoc  vitium  iam  inde  a  saeculo  feruntur  homines,  eo  nos  attentius  doctrinam,  quae  hoc  loco  proponitur,  oportet  expendere:  Saulem  nempe  licet  Agagum  in  vinculis  haberet,  non  ideo  tamen  coram  Domino  culpa  liberatum,  etsi  non  amice  ipsum  ad  mensam  admitteret,  sed  durius  haberet,  quandoquidem  Deus  illum  iusserat  interfici.  Vitam  itaque  Agago  Saul  concedens  in  Deum  iniurius  et  contumeliosus  fuit:  at  proinde  merito  sua  rebellione  debitam  illi  poenam  in  suum  caput  derivavit.  Sequitur  venientem  Agagum  cognovisse  propinquam  sibi  mortem.  In  quibus  verbis  quaedam  etiam  inest  difficultas.  Vox  enim  hebrea  ^  p  passim  in  scriptura  significat  vel  revelare,  vel  declinare.  Itaque  simpliciter  exponi  posse  videtur:  Mors  declinat,  vel  avertitur  a  me.  Sed  quia  sensus  alienior  est,  idcirco  declinare  alii  accipiunt  pro  venire  et  irruere:  quasi  dicat:  Mors  declinat,  non  ut  a  me  avertatur,  sed  ut  in  me  impetum  faciat.  Utraque  tamen  expositio  locum  potest  obtinere.  Nam  si  simpliciter  in  genuina  significatione  vox  illa  Declinare  sumatur,  dicemus  Agagum  sperasse  Samuelem  sibi  condonaturum.  Quomodo  enim  mortem  a  prophetis  divinis  in  quorum  veniebat  manus  metueret,  a  quibus  contra  veniam  exspectabat?  Sic  ergo  potest  hic  locus  exponi,  ut  Agag  prophetae  personam  intuitus  sibi  persuadeat,  se  ab  ipso  dimittendum  et  absolvendum;  qua  in  re  vehementer  fallebatur.  Sin  vero  declinare  pro  irruere  sumatur,  tum  dicemus  Agagum  veluti  morti  propinquum,  exspectare  sententiae  exsequutionem.  Porro  si  sensum  illum  sequamur:  Agagum  spem  aliquam  salutis  concepisse,  quod  in  manus  prophetae  incidisset,  ex  eo  perspicimus  quam  multi  misericordia  divina  quae  in  verbo  ipsius  praedicatur  abutantur:  quod  nimirum  sj>ecie  misericordiae  ius  omne  aequum  corrumpi  et  perverti  velint.  At  vero  nonne  Dei  verbo  remissio  peccatorum  praedicatur?  Quare  ergo  ubi  evangelio  locus  est  tanta  severitas  exercetur?  Verum  enimvero  tam  individuo  nexu  haec  inter  se  iunguntur,  ut  nullo  modo  separari  queant.  Primum  enim  Deus  vocat  peccatores  ad  poenitentiam:  et  nulla  ratio  alia  est  reconciliationis  cum  Deo.  Quare  licet  centies  millies  Dei  gratia  nostras  aures  personet,  quicunque  in  malefactis  perseverant,  non  veniunt  in  partem  istius  promissionis,  et  longe