21:140  curia  coactis  Diacosiis  deventum  est,  ut  paene  exsertis  iam  ensibus  parum  abfuerit  quin  mutuis  caedibus  curiam  ipsam  cruentarent:  quam  seditionem  Calvinus  cum  collegis  superveniens  opposito  inprimis  suo  ipsius  capite  inhibuit,  quanquam  sceleratorum  factio  in  illum  praecipue  ferretur,  ipso  nihilominus  eorum  scelera  pergente  gravissime  detestari  eosque  gravissime  prout  merebantur  increpare.  Neque  vero  vana  fuit  iudiciorum  Dei  denunciatio.  Siquidem  per  id  tempus  quidam  l)  famosum  libellum  scripsisse  et  sacro  pulpito  adfixisse  deprehensus  ,  in  quo  tum  alia  multa  nefaria  in  sacrum  ministerium,  tum  etiam  illud  scriptum  erat,  Calvinum  esse  in  Rhodanum  praecipitandum,  causa  dicta  infinitarum  aliarum  blasphemiarum  praeter  exspectationem  convictus  capitis  supplicio  affectus  est.  Quin  etiam  post  eius  interitum  inventus  est  libellus  ipsius  manu  adversus  Mosen  ipsumque  adeo  Christum  professo  scriptus,  quo  impietatis  scelere  dubium  non  erat,  quin  alios  etiam  aliquot  infecisset.  Scripsit  autem  hoc  ipso  anno  in  mediis  illis  certaminibus  Calvinus  Antidotum  adversus  Tridentini  conciliabuli  sessiones  septem:  itemque  Rotomagensem  ecclesiam  missis  literis  adversus  Franciscani  cuiusdam  fraudes  renovatorum  a  Libertinis  Carpocratis  errorum  venenum  ibi  spargentis  2)  confirmavit.  Anno  sequente,  id  est  quadragesimo  octavo  supra  sesquimillesimum,  erupit  eiusdem  illius  factionis  malum,  iis  (quod  paene  incredibile  est)  maxime  abutente  Satana,  qui  tamen  praecipue  mederi  malis  istis  studebant,  Farello  nempe  et  Vireto.  Qui  ineunte  statim  anno  quum  Genevam  venissent  et  orationem  in  senatu  gravissimam  de  componendis  dissidiis  habuissent,  Calvino  quidem  nihil  aliud  quam  emendationem  morum  postulante,  Perrino  vero  cum  suis  nihil  non  simulante,  ut  pristinum  locum  reciperet,  tum  quidem  visa  sunt  omnia  composita,  sed  bonis  viris  impositum  potius  fuisse  res  ipsa  mox  comprobavit.  Perrino  siquidem  restituto  eousque  sese  extulit  sceleratorum  improbitas,  ut  thoracibus  etiam  quibusdam  in  crucis  modum  dissectis,  quibus  sese  mutuo  agnoscerent,  palam  uterentur,  et  alii  suis  canibus  [B  7]  Calvini  nomen  imponerent,  alii  Calvinum  in  Cainum  transformarent,  non  pauci  denique  illius  odio  abstinere  se  a  coena  Domini  testarentur.  Quae  omnia  quum  fortiter  ille  et  collegae  ipsius  reprehenderent,  vocatis  in  senatum  vicit  quidem  facile  bonorum  innocentia,  tandemque  XVIII.  Decembr.  solenni  iureiurando  1)  'Recentiores  addunt:  Gruetus  civis  Genevensis.  2)  Princeps  male:  spargentem.