54:14  dules  se  contentent  d'estre  riches,  et  d'avoir  leurs  delices  et  voluptez:  et  s'abandonner  a  toutes  leurs  concupiscences:  et  puis  de  se  faire  valoir,  et  puis  d'acquerir,  et  d'abonder  selon  le  monde:  voila  tout  leur  bien,  et  toute  leur  felicite.  Or  au  contraire,  il  nous  faut  avoir  ceste  prudence,  qu'ayans  les  biens  du  monde,  ayans  nos  aises  et  commoditez,  et  toutes  choses,  nous  cerchions  que  Dieu  nous  soit  Pere,  et  qu'il  nous  tiene  pour  ses  enfans.  Quand  nous  aurons  cela,  observons  en  second  lieu  et  inferieur  la  paix  que  met  aussi  bien  sainct  Paul.  Car  sous  ce  mot  de  paix,  il  comprend  toutes  choses  qui  nous  sont  propres  et  convenables,  ce  que  nous  appellons  prosperite.  Ne  pensons  point  donc  prosperer  vrayement,  sinon  d'autant  que  nous  serons  aimez  de  Dieu.  Et  au  reste  quand  sainct  Paul  conioint  la  paix  avec  l'amour  de  Dieu,  il  signifie  que  Dieu  est  assez  riche  pour  nous  donner  tout  ce  qu'il  nous  faudra,  quand  de  nostre  coste  nous  demanderons  d'estre  aimez  de  luy,  qu'il  ne  faut  point  que  nous  craignions  de  tout  le  reste.  Et  c'est  encores  un  poinct  bien  notable:  car  nous  voyons  comme  nostre  nature  nous  solicite  a  deffiance,  et  nous  semble  tousiours  que  terre  nous  doit  faillir.  Et  cependant  quel  honneur  faisons-nous  a  Dieu?  Nous  confesserons  qu'il  est  nostre  Pere,  et  chacun  se  glorifiera  de  ce  titre:  et  cependant  si  rien  nous  defaut,  nous  sommes  en  telle  angoisse  que  c'est  pitie,  nous  sommes  la  en  perplexite,  comme  si  Dieu  ne  pouvoit  rien,  comme  s'il  estoit  despourveu  de  moyens  pour  nous  secourir.  Voyans  doncques  que  nous  sommes  ainsi  agitez  de  deffiance,  d'autant  plus  nous  faut-il  mediter  ceste  doctrine,  et  appliquer  nostre  estude,  quand  il  dit  que  si  Dieu  nous  est  propice,  il  ne  faut  point  douter  qu'il  ne  nous  face  prosperer,  et  que  par  sa  benediction  il  ne  nous  donne  ce  qui  est  requis:  mais  quoy  qu'il  en  soit,  contentons-nous  de  la  simple  grace  de  Dieu.  Il  est  vray  que  nous  luy  pourrons  bien  demander  tout  ce  qui  nous  fait  besoin,  iusques  a  un  morceau  de  pain  pour  manger:  il  faut  que  nous  deschargions  toutes  nos  solicitudes  en  luy:  mais  tant  y  a  qu'il  nous  faut  commencer  au  principal,  c'est  ascavoir  a  l'amour  qu'il  nous  porte,  et  que  nous  scachions  qu'il  a  le  soin  de  nostre  salut:  et  quand  cela  est,  qu'il  nous  suffise,  encores  que  tout  le  reste  nous  defaille.  Or  sainct  Paul  finalement  met,  De  par  Dieu  le  Pere,  et  nostre  Seigneur  Iesus  Christ.  En  quoy  il  conferme  la  doctrine  que  nous  avons  desia  exposee:  c'est  que  si  les  hommes  cerchent  d'avoir  tout  ce  qui  leur  est  propice,  il  ne  faut  point  qu'ils  s'eslongnent  de  Dieu.  Et  toutesfois  nous  voyons  comme  nos  appetits  voltigent  ca  et  la  :  et  cependant  qui  est-ce  qui  cerche  Dieu?  Il  est  vray  que  nous  en  parlerons  en  un  mot  :  mais  qu'un  chacun  regarde  de  pres,  et  on  trouvera  que  nous  voudrions  bien