39:14  pronuntiat  eum  iustum  esse  mundi  iudicem:  et  iterum  altero  fraeno  se  compescit,  ne  audeat  iudicium  ferre  de  operibus  Dei  pro  suo  sensu.  Tu,  inquit,  clementiam  erga  mille.  Sumptum  est  hoc  ex  lege  Mosis,  quemadmodum  prophetae  mutuantur  praecipuas  sententias  ex  Mose,  cuius  sunt  interpretes.  Quum  autem  Deus  in  lege  pronuntiet  se  esse  misericordem  in  mille  generationes,  quia  hoc  videtur  nobis  absurdum,  nihil  aliud  superest,  nisi  ut  reverenter  suscipere  discamus  quod  non  possumus  comprehendere,  propheta  igitur  hic  fatetur  modum  quem  tenet  Deus  in  sua  clementia,  esse  humanae  menti  absconditum.  Iam  posterius  membrum  videtur  minus  consentaneum  esse,  quod  Deus  rependat  iniquitatem  patrum  in  sinum  filiorum.  Paulo  ante  vidimus  impiam  fuisse  illam  blasphemiam,  quum  iactarent  patres  comedisse  uvas  acerbas  et  dentes  filiorum  obstupuisse.  Nam  verum  est  semper  illud,  Anima  quae  peccaverit,  ipsa  morietur.  Quod  si  Deus  rependit  patrum  iniquitatem  in  filios,  ita  poenam  exiget  de  insontibus,  et  transferet  ad  filios  quod  patribus  rependere  debebat.  Sed  propheta  quoniam  nefas  erat  contradicere,  ubi  Deus  per  Mosen  ita  loquutus  erat  :  hic  adorat  mysterium  illud,  et  ita  sese  ad  humilitatem  et  modestiam  format,  ne  scilicet  prorumpat  in  nimiam  licentiam  ubi  agitur  de  arcanis  Dei  operibus.  Interea  breviter  notandum  est  non  puniri  innoxios,  quum  Deus  involvit  filios  una  cum  patribus,  et  reiicit  patrum  iniquitatem  in  sinum  filiorum.  Neque  enim  agitur  de  iustis  et  innoxiis,  sed  de  reprobis.  Quidam  quum  viderent  pugnare  hanc  sententiam  cum  sensu  communi  hominum,  eifugium  captarunt,  quod  scilicet  Deus  temporalibus  poenis  rependat  filiis  quod  patres  erant  meriti.  Sed  sine  exceptione  loquitur  Deus  quum  dicit  se  rependere  in  sinum  filiorum  mercedem  patribus  debitam.  Quomodo  autem  hoc  debet  intelligi?  nam  pars  eius  poenae  est,  quod  Deus  destituit  eos  spiritu  suo.  Quum  ergo  vult  punire  scelera  patrum  in  posteris,  privat  spiritus  sui  luce  et  gratia  ipsos  posteros.  Fieri  igitur  non  potest  quin  semper  accumulent  mala  malis,  et  ita  teneantur  impliciti  patrum  reatu.  Procedit  igitur  Deus  gradatim  in  puniendis  sceleribus,  quia  si  velit  remittere  poenam  filio,  quia  dignus  erat  simul  cum  patre,  spiritu  suo  ipsum  ad  se  trahet:  ita  erit  immunis  a  poena.  Quod  si  velit  persequi  vindictam  suam  in  filiis  et  nepotibus,  quemadmodum  iam  dixi,  destituet  eos  spiritus  gratia,  ut  nihil  aliud  possint  quam  magis  ac  magis  iram  eius  provocare,  et  ita  se  in  eundem  cum  patribus  reatum  demergent:  inde  communis  erit  poena  patribus  et  filiis.  Hoc  quidem  non  videtur  nobis  consentaneum  primo  intuitu.  Sed  meminerimus  ideo  abscondita  nobis  esse  iudicia  Dei,  ut  nos  exerceamus  in  modestia  et  humilitate,  et  discamus  sobrie  sapere,  et