29:14  creatures  raisonnables,  qu'il  met  son  image  en  nous.  Voila  desia  un  benefice  inestimable  qu'il  nous  fait.  Mais  cependant,  pource  que  nous  sommes  corrompus  en  Adam,  et  que  nous  sommes  du  tout  maudits:  que  le  peche  domine  tellement,  que  ceste  image  de  Dieu  est  effacee,  que  ce  que  nous  cuidons  avoir  d'intelligence  n'est  que  bestise,  que  nos  coeurs  sont  pervertis,  et  qu'il  n'y  a  que  rebellion:  a  cause  de  cela  il  est  dit,  que  nous  ne  meritons  point  d'estre  reputez  ni  tenus  pour  peuple,  c'est  a  dire,  qu'il  vaudroit  mieux  que  nous  ne  fussions  rien.  Non  pas  que  Dieu  ne  soit  tousiours  glorifie  en  ses  creatures:  mais  ceci  est  dit  quant  a  nous.  Oar  nous  voulons-nous  maintenir,  et  apparoistre  grand  cas:  comme  nous  voyons  que  les  hommes  se  font  accroire  merveilles  d'eux,  qu'ils  sont  tant  aveuglez,  qu'ils  cuident  estre  ceci  et  cela.  Or  que  les  enfans  de  ce  monde  s'estiment  tant  qu'ils  voudront,  qu'ils  mettent  en  avant  leur  gloire:  voici  Dieu  en  un  mot,  pour  abbattre  leur  caquet,  qui  dit  qu'ils  sont  comme  s'ils  n'estoyent  point.  Et  ce  n'est  point  seulement  ici  que  l'Escriture  use  de  ce  langage:  mais  S.  Paul  dit  en  general,  que  Dieu  a  appelle  les  choses  qui  ne  sont  point  comme  si  elles  estoyent.  Voila  donc  nostre  origine,  c'est  quand  Dieu  nous  attire  a  la  cognoissance  de  sa  verite,  que  nous  commencons  d'estre:  comme  aussi  en  l'autre  passage  S.  Paul  dit,  que  nous  sommes  de  Dieu  en  Iesus  Christ  :  qu'auparavant  nous  n'avons  rien  este,  pource  qu'il  n'y  a  en  nous  que  corruption.  Puis  qu'ainsi  est,  les  hommes  ne  peuvent  attendre  sinon  la  mort  eternelle,  iusques  a  ce  que  Dieu  leur  ait  tendu  la  main,  et  qu'il  les  ait  recueillis  a  soy.  Voila  donc  ce  que  nous  avons  a  retenir  en  ce  passage,  quand  il  est  dit,  que  Dieu  provoquera  a  ialousie  les  Iuifs  par  un  peuple  qui  n'estoit  point.  Au  reste,  notons  que  si  auiourd'huy  nous  sommes,  c'est  a  dire,  que  Dieu  nous  ait  eslevez,  comme  aussi  il  le  dit  par  son  Prophete  Isaie:  I'ay  nourri  ces  enfans,  et  les  ay  eslevez:  si  donc  Dieu  nous  a  fait  ceste  grace  auiourd'huy,  c'est  que  nous  ayons  succede  en  la  place  de  ceux  qui  estoyent  enfans  naturels,  nous  qui  n'estions  qu'avortons:  que  nous  advisions  bien  que  quand  nous  aurons  irrite  Dieu,  et  provoque  a  ialousie,  qu'il  saura  bien  susciter  d'autres  peuples:  comme  aussi  nostre  Seigneur  Iesus  Christ  disoit  aux  Iuifs  :  Le  royaume  de  Dieu  vous  sera  oste.  Ceste  menace  s'adresse  auiourd'huy  a  nous:  car  comme  dit  S.  Paul:  Si  Dieu  n'a  point  espargne  le  bois  naturel  de  l'olivier,  et  que  tout  cela  soit  couppe  et  mis  au  feu  :  comment  espargnerail  les  sauvageons?  Nous  qui  estions  steriles  de  nature,  qu'est-ce  que  nous  avions?  Pouvions-nous  dire  que  nous  fussions  enfans  d'Abraham,  et  que  Dieu  nous  eust  adoptez  du  premier  coup?  Nenni.  Car  du  temps  que  la  doctrine  de  salut  a  este  en-