26:14  bien  commun,  et  le  fera-on  accroire  :  mais  cependant  les  povres  suiets,  apres  avoir  paye  tailles,  tributs  et  tant  d'imposts  pour  soustenir  les  despens  de  la  guerre,  encores  faut-il  qu'ils  soyent  mangez  iusques  aux  os,  qu'on  ne  travaillera  point  plus  les  ennemis,  que  ceux  sous  le  nom  et  sous  le  tiltre  desquels  la  guerre  se  meine.  On  fera  bien  des  estappes,  pour  dire  qu'on  paye.  Mais  quoy?  ce  qui  vaut  trois  solz,  sera  estime  un:  et  le  plus  souvent  encores  on  vivra  a  discretion.  Ainsi  voyons-nous,  en  somme,  qu'auiourduy  ce  ne  sont  que  brigandages  de  toutes  les  guerres  qui  se  meinent:  qu'il  y  a  des  cruautez  et  inhumanitez  si  exorbitantes,  que  c'est  une  confusion  extreme,  qu'il  semble  qu'on  vueille  oublier  toute  equite:  et  qu'une  guerre  ne  se  puisse  faire,  qu'on  n'oublie  toute  droiture:  qu'il  n'y  ait  plus  de  loy,  que  les  hommes  deviennent  comme  bestes  furieuses.  Voila  ou  l'on  en  est.  Or  tant  y  a,  que  ceste  doctrine,  comme  elle  ne  peut  estre  effacee  de  l'Escriture  saincte,  ne  pourra  pas  aussi  estre  effacee  du  registre  de  Dieu,  qu'il  ne  iuge  le  monde  selon  qu'il  en  a  desia  prononce:  c'est  assavoir,  que  les  gendarmes  qui  veulent  s'enrichir  du  bien  d'autruy,  quelque  chose  qu'ils  alleguent,  combien  que  ils  tirent  en  coustume  de  piller  et  desrober,  combien  qu'ils  n'ayent  point  les  gages  suffisans  (diront-iis)  quelque  couleur  qu'ils  puissent  amener,  si  est-ce  que  Dieu  les  condamne.  Ils  auront  beau  appeller  les  Rois,  et  les  Princes  pour  leurs  garans:  car  ceux-la  meineront  la  dance:  et  il  faudra  qu'ils  respondent  comme  les  Princes  des  brigans,  et  puis  tous  leurs  soldats  les  suyuront  comme  estans  complices  de  leurs  iniquitez.  Or  par  cela  nous  sommes  admonnestez  de  prier  Dieu,  voyans  les  confusions  telles  au  monde,  qu'il  ne  permette  point  que  nous  y  soyons  enveloppez:  mais  quand  nous  luy  demandons  nostre  pain  ordinaire,  que  nous  regardions  tousiours  la:  He  Seigneur,  fai-nous  ce  bien  qu'un  chacun  puisse  vivre  de  son  labeur,  et  que  nous  soyons  en  paix,  et  quand  un  tabourin  aura  sonne,  que  nous  ne  soyons  point  comme  forcenez:  qu'un  chacun  ne  soit  point  adonne  a  ravir,  et  a  piller,  mais  que  tu  nous  maintiennes  en  paix,  afin  que  nous  travaillans,  et  que  nous  puissions  te  rendre  graces  quand  tu  nous  auras  nourri:  et  qu'un  chacun  ait  son  droit,  et  qu'il  ne  face  nulle  violence.  Et  au  reste,  s'il  est  commande  notamment  a  ceux  qui  font  la  guerre,  d'acheter  le  pain,  d'acheter  l'eau  qu'ils  boyront,  ie  vous  prie,  que  devons-nous  faire  en  paix?  Car  encores  semble-il  que  beaucoup  d'outrages  fussent  a  demi  a  excuser,  quand  la  guerre  est  ouverte:  comme  il  peut  advenir  que  ceux  qui  voudroyent  bien  estre  humains,  ne  peuvent  quelque  fois:  qu'ils  sont  contrains  de  faire  des  choses  qu'ils  ne  voudroyent  pas  commettre,  mesmes  entre  les  ennemis:  et  cependant  si  voit-on  que  si  on  prend