24:14  metuit,  haec  trepidatio  impellit  eum  in  horrorem,  ut  terram  humano  sanguine  operire  non  dubitet.  Hinc  et  inter  privatos  fraudandi,  caedendi,  rapiendi,  mentiendi  licentia:  quia  nimis  sero  repelli  iniurias  putant,  nisi  dum  quisque  antevertit.  Atqui  haec  nimis  improba  est  calliditas  (licet  fucosa  providentiae  specie  tegatur)  ut  nobis  bene  sit,  inique  aliis  molestos  esse.  Hunc  vel  illum  metuo,  quia  et  facultas  nocendi  suppetit,  et  de  eius  animo  sum  incertus:  itaque  ut  securus  sim  ab  omni  noxa,  quacunque  potero  arte  illum  opprimere  conabor.  Nempe  contemptissimus  etiam  quisque  et  maxime  imbecillis,  si  ad  maleficium  inclinet,  erit  armatus  in  nostram  perniciem:  ac  proinde  de  maiori  hominum  parte  dubitabimus.  Si  ita  suae  diffidentiae  omnes  indulgeant,  dum  pro  se  quisque  machinabitur  dubiis  hostibus  aliquid  iniuriae,  nullus  erit  scelerum  modus.  Quare  immodicis  curis  et  anxietatibus,  quae  ab  aequitatis  studio  nos  abstrahunt,  opponenda  est  Dei  providentia:  in  quam  si  recumbimus,  nullus  unquam  periculi  timor  ad  iniquum  facinus  aut  vafram  consultationem  nos  impellet.  In  verbis  Pharaonis  omnia  contraria;  nam  ubi  admonuit,  Israelitas,  si  velint,  posse  damnum  inferre,  suadet  vires  eorum  quovis  modo  esse  frangendas.  Neque  enim  quaeritur  fas  sit  necne,  ubi  semel  statutum  est,  prospicere  suis  commodis,  vel  otio,  vel  saluti.  10.  Ecce  populus.  Non  raro  contingit  Dei  benedictionibus  quasi  aculeis  pungi  ad  aemulationem  improborum  animos,  imo  quasi  flabellis  eorum  labiem  accendi.  Neque  tamen  ideo  vel  minimum  divini  favoris  testimonium  minus  amabile  nobis  esse  debet,  quia  occasio  sit  improbis  in  nos  gravius  saeviendi.  Atque  ita  consulto  suam  liberalitatem  Deus  temperat,  ne  simus  terrenae  prosperitati  nimium  affixi.  Ita  Iacob  ex  domo  patris  et  haereditate  promissa  in  exsilium  eiecit  benedictio,  ex  qua  pendebat  tota  eius  felicitas:  sed  hoc  uno  solatio  lenivit  suos  dolores,  quod  sciret  Deum  sibi  esse  propitium.  Ita  et  posteri,  quo  Deum  magis  beneficum  experti  sunt,  eo  infestiores  senserunt  Aegyptios.  Pharao  autem,  ut  eos  reddat  exosos  vel  suspectos,  eorum  potentiam  in  medium  proferens,  eos  insimulat  defectionis,  cuius  nullum  signum  dederant.  Neque  tamen  eos  dicit  fore  rebelles,  ut  imperium  armis  occupent:  sed  ut  alio  migrent.  Unde  coniicere  licet,  spem  quam  de  reditu  fecerat  Deus  non  dissimulasse.  Haec  autem  visa  est  plausibilis  excusatio,  minime  aequum  esse,  ut  qui  sponte  concesserant  in  fidem  regis,  liberi  dimitterentur:  sicuti  etiam  commemorat  Isaias  52,  4.  l  l  .  Constituerunt  igitur.  Hoc  remedium  Aegyptii  excogitarunt  atterendis  paulatim  filiis  Israel.  Subditi  sunt,  licet  igitur  vectigalium  oneribus  eos  gravare,  ne  caput  attollant:  haec  servitus  eos  debilitabit  et  imminuet.  Verum  subiectio  non  eo  usque  trahenda