11:14  ut  suspicax  non  est  caritas,  sic  in  iis  quae  totum  respiciunt  corpus  Christi  nihil  deferendum  huic  aut  illi,  sed  vel  cum  iactura  membri,  si  res  poscat,  corpori  est  consulendum.  Quod  experti  in  nobis  dolemus,  dum  aliquando  cupientes  adesse  alicui  vel  ab  aliis  persuasi,  quantum  nonnullis  indulsimus,  tantum  ecclesiae  parum  prospeximus.  Hic  te  appello  si  non  et  contigerit  dum  admiramur  titulos  ac  audimus  affectibus  propriis  inflammatos,  qui  etiamnum  sic  ardent  ut  sibi  excidant.  Siquidem  ita  ferri  quosdam  video  ut  quidquid  probent  aliqui  illis  improbetur  :  sufficiens  est  causa  ut  respuant:  non  ingratum  aliis  esse  quae  amplexentur  ab  aliis  non  probari,  ac  si  Marius  omnes  reputaret  amicos  qui  Syllae  non  placent.  Hic  flagitant  diligentem  rerum  examinationem,  non  personarum  affectum.  Sane  qui  vel  ut  viscera  in  Domino  mihi  cari  et  intimi  fuerunt,  hac  ratione  tam  graviter  me  offenderunt  ut  tantum  memoria  me  cruciet.  Si  factiones  in  omni  republica  sunt  perniciosae,  in  ecclesia  mihi  sunt  ipsa  pernicies.  Ego  cum  fratribus  causam  Domini  volo  tantum  curari  et  non  alicuius.  Omnes  deiiciantur  et  nihil  sint  in  se  ipsis,  ut  Christus  exaltetur  et  omnia  sit,  cui  quam  miserrime  servitur  iam:  tam  sunt  plerique  omnes  ambitiosi,  seque  quaerentes  ac  sua,  ut  Christi  nullam  habeant  rationem.  Et  quo  plus  pergo,  plus  experior  in  iis  quos  ardere  oportet  pro  Christi  gloria.  Hic,  frater,  laboro  ne  quibusvis  fucis  sub  Christi  nomine  fides  habeatur,  ac  tanti  fratres  illorum  non  serviant  affectibus.  Quam  vellem  hic  possem  fratribus  satisfacere,  ac  quod  expertus  sum  eloqui:  sed  te  puto  capere  quid  velim.  Alterum  est  quod  currentes  ut  alios  Domino  lucrifaciant,  ac  satagentes  ut  concilient  omnes  si  potest  fieri,  sic  agant  ut  multo  parta  labore  non  pereant  ac  coniuncta  non  desiliant,  neve  fiat  ut  quae  stabant  cadant,  quae  surgebant  suffocentur,  et  quae  prodire  poterant  impediantur  et  desperata  firmentur.  Nam  quae  a  nostris  prodeunt,  si  non  recte  fiant,  quantam  putas  ruinam  cient?  Ab  Altomonte2)  nobis  est  testis  infelix,  sicut  et  opera  quibus  potest  papismus  vel  in  parte  firmari.  Hoc  iubebar  attingere,  sed  peculiariter  de  fovenda  vel  potius  resarcienda  concordia  cum  Tigurinis,3)  quorum  ecclesia  non  potest  contemni,  siquidem  a  nonnullis  subindicabatur  parum  convenire.  Bene  ut  conveniat  hic  valde  laborandum.  Vereor  ne  per  eos,  qui  fratribus  se  fingunt  qui  istic  sunt  amicos,  et  aliis  quoque  semina  odii  imo  incendium  alatur,  ut  in  aliis  etiam  est  videre.  Dum  interdum  liberius  scripta  non  ut  scribuntur,  aut  non  a  quibus  oportet,  accipiuntur,  suppressa  expediret  magis  aliqua,  et  nescire  multos.  2)  Be  Haultmont,  nomen  Ludovici  Du  Tillet  adsciUtium  3)  Inter  quos  et  Argentoratenses  exorta  fue?  at  dissensio  propter  JSp,  Bullingeri  libello  Vadiani  praemtssam.