44:138  autem  homines  quibus  nulla  cura  pietatis,  tam  liberaliter  abs  te  foveantur?  Nonne  praestaret  exstingui  memoriam  nominis  tui,  et  cultum  omnem  intercidere,  quam  tam  iniustam  mercedem  referri  servis  tuis?  Nunc  videmus  quo  tendat  visio,  nempe  ut  certo  statuant  Iudaei  afflictiones  quas  sustinent  non  fore  perpetuas:  Quare?  Deus  enim  non  dormit  in  coelo,  sed  habet  suos  cursores:  deinde  quum  velit  tranquillas  esse  omnes  gentes,  certe  respiciet  tandem  populum  suum  ut  a  molestiis  eripiat.  Quamvis  ergo  obscura  sit  visio,  tamen  finis  eius  non  est  ambiguus.  Deinde  si  contenti  simus  mediocritate,  nihil  hic  erit  adeo  perplexum,  quin  saltem  facile  sit  summam  totius  vaticinii  colligere.  Sed  multum  nocuit  curiositas  interpretum,  qui  dum  excutiunt  singulas  syllabas,  pueriliter  ludunt  in  multis.  Ergo  nihil  melius  est  quam  attendere  ad  consilium  prophetae:  deinde  respicere  circumstantias  temporis:  tertio  analogiam  sequi  inter  signa  et  res  signatas.  Dixi  autem  ideo  hic  proponi  in  medium  angelos:  quia  difficile  nobis  esset  conscendere  ad  summam  Dei  gloriam.  Scimus  Deum  non  cogi  necessitate,  ut  angelis  utatur  ministris,  et  per  eos  exsequatur  sua  iudicia,  poenas  infligat  hominibus,  beneficentiam  quoque  suam  exerceat.  Deus  enim  sibi  ad  haec  omnia  unus  sufficit.  Quare  ergo  adhibet  sibi  angelos,  et  eorum  opera  utitur,  si  supervacua  est?  Responsio  facilis  est,  quia  ut  propensi  sumus  ad  diffidentiam,  trepidamus  semper  in  periculis,  nisi  sciamus  Deum  instructum  esse  multis  copiis  ad  nos  iuvandos  quoties  opus  erit.  Quum  dicitur  Psalmo  34  (v.  8):  angeli  castra  locant  in  circuitu  timentium  Deum  :  nonne  hoc  efficacius  est,  quam  si  simpliciter  dictum  esset  Deum  nobis  esse  pro  arce?  dicitur  hoc  quidem  pluribus  locis,  Deus  arx  mea  inexpugnabilis:  sed  quia  non  desinunt  multi  vacillare  adhuc  ubi  audiunt  sibi  satis  esse  praesidii  in  Deo:  hic  Deus  indulgens  ruditati  eorum,  adiungit,  Etiam  venio  cum  ingenti  exercitu,  non  solus  sum  vobis  auxiliator,  sed  praesto  sunt  ad  nutum  meum  multae  copiae.  Quum  ergo  ita  mihi  visum  fuerit,  statim  concurrent  turmatim  angeli,  imo  multae  myriades.  Quum  ergo  Deus  ita  loquitur,  haec  ratio  docendi  aptior  est  ad  captum  hominum.  Ita  nunc  quum  Zacharias  videt  multos  cursores,  qui  divinitus  iussi  sunt  perambulare  terram  et  lustrare,  hinc  certius  colligere  potuit,  nihil  temere,  aut  fortuito  geri  in  terra  sed  omnia  venire  in  Dei  conspectum,  et  rationem  omnium  exponi  ab  angelis  quemadmodum  etiam  primo  capite  Iob  talis  ratio  describitur,  quod  scilicet  veniant  ad  tribunal  Dei  omnes  filii  eius,  id  est  angeli  :  imo  etiam  inter  ipsos  Satan:  quia  etsi  non  sponte  obsequitur  Deo,  tamen  quum  lustrat  orbem,  simul  iudicia  Dei  exercet  quamvis  invitus.  Nunc  ergo  tenemus  causam  cur  Deus  non  apparuerit  ipse,  ac  prophetae  testatus