30:138  hominibus  dare,  ut  paratam  aeternam  condemnationem  fugiant.  Sed  pro  ista  cogitatione  potius  magis  obfirmantur  in  flagitiis,  ut  videantur  neque  ratione  ulla  praediti,  neque  etiam  quas  meriti  sunt  poenas  laturi:  et  vehementer  tam  ipsi  Deo  quam  hominibus  reluctantur  et  indignantur  omni  posito  pudore  et  verecundia.  Nos  vero  caveamus  summopere  ne  istis  similes  simus:  Deo  reluctantes,  ne  longe  sit  deterior  nostra  conditio  futura:  quin  potius  Deo  nostram  turpitudinem  palam  evulgari  volenti  ultro  subiiciamur  et  obtemperemus.  Et  hactenus  de  verbis  illis  Saulis  dictum  esto,  quibus  rogavit  Samuelum  ut  secum  veniret,  seque  honor  are  t  coram  senioribus  populi  et  coram  Israele,  ut  ea  ratione  suam  apud  ipsos  autoritatem  retineret.  Quasi  vero  Samuel  Dei  decretum  posset  immutare:  aut  posset  apud  homines  autoritatem  obtinere  qui  Dei  iudicio  et  manu  deiiciebatur.  Deus  tanquam  fulmine  ipsum  lata  sententia  percusserat,  et  nihilominus  hominum  favorem  et  benevolentiam  sibi  pollicetur.  Quod  quid  aliud  est,  obsecro,  quam  Deum  ex  suo  sensu  metiri,  et  ipsi  velut  in  faciem  resistere?  Procul  a  nobis  absit  tantus  stupor:  et  Deum  nobis  infensum  sentientes,  ne  a  rebus  creatis  auxilium  exspectemus:  nam  ita  maiorem  in  nos  condemnationem  accerseremus.  Nihilominus  tamen  Samuel  illum  comitari  voluit:  nempe  quod,  ut  heri  attigimus,  nondum  venisset  exauctorationis  illius  tempus  et  momentum  prophetae  et  hominum  respectu  :  quod  tamen  apud  Deum  ratum  erat.  Sed  nullus  dum  designatus  successor  fuerat,  quem  tamen  ipsum  a  Deo  promissum  oportebat  exspectari.  David  nondum  unctus  et  inauguratus  fuerat:  ideoque  Samuel  regem  adhuc  ad  tempus  colit,  licet  tamen  decreto  Dei  reiectum.  Deinceps  dicitur  Saul  adorasse  Dominum  :  quibus  verbis  indicatur  ipsum  solenne  fecisse  sacrificium.  Non  ergo  manifeste  in  Deum  fuit  impius,  et  divinae  maiestatis  contemptor:  sed  ita  solent  quorum  non  est  mens  recta  semper  aliquam  prae  se  ferre  pietatem,  et  aliquem  splendorem,  quasi  Deo  maxime  subiici  vellent.  Sed  non  dubium  est  quin  Saul  fraudes  in  pectore  agitaret,  et  rebellionem  meditaretur,  et  aleret  occultum  virus,  quod  regno  excidisset,  quemadmodum  id  deinceps  ipsa  experientia  confirmabit,  et  Deum  interim  adoret.  An  vero  istud  tantum  ut  coram  populo  pietatem  simulet?  Minime  quidem  :  sed  ille  sibi  ipse  imponit  :  et  ita  peccatum  peccato  cumulat.  Nam  ita  saepe  solent  homines  pietatem  simulare,  quum  tamen  nulla  pietas  in  illa  ficta  simulatione  sit,  sed  mera  potius  hypocrisis.  Sed  maxima  pars  hominum  dum  multis  externis  caeremoniis  Deum  colunt,  eundem  sibi  devinctum  arbitrantur,  quasi  bene  de  illo  meriti,  et  egregia  quadam  virtute  praediti,  quae  cultum  illum  Deo  et  hominibus  gratum  reddere  debeat.  Verum  nulla