27:137  137  SUR  LE  DEUTER.  CHAP.  XI.  138  homines  n'ont  peu  rien  meriter,  et  non  sans  cause.  Car  quand  nous  ferions  tout  ce  qui  nous  est  possible  (comme  i'ay  desia  dit)  pouvons-nous  rien  desservir  envers  Dieu?  Car  nous  luy  devons  tout  cela,  et  il  ne  nous  doit  rien.  Voila  donc  pourquoy  Moyse  dit  ici,  que  quand  la  Loy  a  este  publiee,  la  benediction  a  este  mise  devant  le  peuple.  Comme  s'il  disoit:  Par  ci  devant  vous  ne  cognoissiez  nulle  reigle,  vous  eussiez  este  comme  les  povres  incredules  qui  vont  a  l'aventure,  et  cependant  n'ont  nulle  asseurance  :  mais  vostre  Dieu  vous  a  recueillis  a  soy,  il  vous  a  monstre  le  bon  chemin.  Ainsi  donc  voila  comme  vous  pourrez  mener  une  vie  heureuse:  ce  sera,  obeissant  a  la  volonte  de  vostre  Dieu.  Et  puis  il  y  a  aussi  la  promesse  coniointe  :  et  par  icelle  le  peuple  pouvoit  esperer  que  Dieu  le  beniroit.  C'est  donc  ce  que  i'ay  desia  declaire,  que  Dieu  nous  fait  une  grande  grace,  quand  il  luy  plaist  nous  monstrer  quelle  facon  de  vivre  nous  devons  tenir.  Car  sans  cela  nous  pourrions  nous  tourmenter  beaucoup,  ce  ne  seroit  que  peine  perdue,  et  inutile.  Et  ainsi  advisons  de  recevoir  en  tant  plus  grande  reverence  la  parolle  qui  nous  est  proposee  au  nom  de  Dieu,  veu  qu'elle  nous  apporte  benediction:  ie  di  tant  pource  que  nous  cognoissons  quelle  est  la  volonte  de  nostre  Dieu,  et  que  nostre  vie  luy  sera  agreable,  qu'aussi  il  s'oblige  volontairement:  encores  qu'il  n'y  ait  nul  devoir,  si  est-ce  qu'il  veut  contracter  avec  nous,  en  telle  facon  que  nous  ne  le  servions  point  en  vain.  Mais  ici  on  pourroit  faire  une  difficulte,  comment  c'est  que  Moyse  parlant  de  la  Loy,  dit  qu'il  propose  la  benediction?  Car  quoy  que  Dieu  nous  promette  en  sa  Loy  (ainsi  que  hier  il  en  fut  traitte)  tout  cela  ne  parviendra  point  iusques  a  nous:  car  il  y  a  tousiours  un  si  adiouste,  c'est  assavoir  que  Dieu  nous  promet  sa  benediction,  quand  nous  aurons  observe  ce  qu'il  nous  commande.  Or  nul  ne  s'en  acquitte:  nous  voila  donc  tous  frustrez  de  la  promesse  de  la  Loy,  a  cause  de  la  condition  qui  est  impossible.  Il  semble  donc  que  Moyse  ne  dise  rien  en  ce  passage,  promettant  benediction  au  peuple.  Et  de  faict,  nous  oyons  comme  sainct  Paul  en  parle.  Il  dit  que  la  Loy  n'a  apporte  qu'ire,  et  vengeance  de  Dieu,  a  cause  qu'elle  nous  redargue  tous  tant  que  nous  sommes,  qu'il  n'y  a  pas  un  seul  homme  qui  se  trouve  iuste,  et  iamais  il  n'y  en  a  eu.  Nous  voila  donc  tous  conveincus  par  la  Loy  d'avoir  transgresse  la  iustice  de  Dieu:  ainsi  nous  sommes  coulpables  de  mort  eternelle.  Puis  qu'ainsi  est:  il  sensuit  que  la  Loy  ne  peut  sinon  en  soy  nous  monstrer  que  nous  sommes  execrables  a  nostre  Dieu,  qu'il  est  nostre  ennemi  mortel,  qu'il  faut  qu'il  soit  nostre  iuge.  Et  ou  est  la  benediction  que  allegue  ici  Moyse?  La  response  a  cela  est,  que  si  nous  regardons  quels  nous  sommes  en  nostre  na-