27:136  neu  quelle  est  la  vraye  religion  et  pure  :  si  nous  ne  poursuyvons,  toute  la  coulpe,  et  tout  le  mal  nous  doit  estre  impute.  Car  Dieu  nous  avoit  monstre  le  bon  chemin,  nous  ne  l'avons  point  tenu  ne  suyvi:  il  faut  donc  que  nous  soyons  forclos  de  toute  excuse,  et  que  Dieu  nous  tienne  la  convaincus  de  ce  qu'a  nostre  escient  nous  avons  mieux  aime  perir,  et  aller  en  perdition,  que  de  nous  ranger  a  luy,  lequel  nous  vouloit  mener  a  vie  et  a  salut.  Pour  ceste  cause  Moyse  dit  :  Voici,  ie  vous  propose  maintenant  benediction  et  malediction.  Comme  s'il  disoit:  Pensez  a  vous:  quand  Dieu  m'a  commande  de  vous  publier  sa  Loy,  il  n'est  plus  question  de  dormir.  Car  d'un  coste  il  vous  monstre  comme  vous  pourrez  prosperer  en  toute  vostre  vie,  c'est  assavoir,  si  vous  luy  obeissez.  Au  contraire,  ne  pensez  point  eschapper  quand  vous  aurez  este  rebelles  a  vostre  Dieu,  une  telle  ingratitude  ne  demeurera  point  impunie.  Car  il  faut  que  Dieu  se  venge  de  ce  qu'on  a  reiette  sa  doctrine,  et  qu'on  n'en  aura  tenu  conte.  Ainsi  en  premier  lieu  nous  sommes  admonnestez  que  ce  nous  est  un  thresor  inestimable,  d'avoir  cogneu  la  volonte  de  Dieu.  Nous  desirons  tous  de  mener  une  vie  heureuse  :  or  il  n'y  a  autre  moyen,  sinon  que  Dieu  nous  ouvre  la  porte  pour  venir  a  luy.  Si  on  allegue:  Et  comment  donc?  quand  les  hommes  s'estudieront  a  bien  faire,  ne  seront-ils  pas  benits?  Dieu  n'acceptera-il  point  tout  leur  service  quand  il  les  verra  cheminer  d'un  bon  desir?  Or  notons  en  premier  lieu,  que  les  hommes  pourroyent  avoir  la  plus  grande  devotion  qu'il  est  possible  a  leur  semblant:  mais  ils  ne  feront  qu'errer.  Ce  n'est  pas  le  tout  quand  nous  cuiderons  bien  faire:  mais  il  faut  que  nous  soyons  asseurez  que  le  chemin  que  nous  tenons  n'est  point  quelque  traverse  pour  nous  esgarer,  mais  que  nous  aspirons  droit  a  Dieu.  Voila  donc  comme  nous  ne  pouvons  estre  asseurez  de  nulle  benediction:  c'est  a  dire,  que  nous  ne  saurons  si  nostre  vie  plaira  a  Dieu,  si  les  services  que  nous  luy  rendons  luy  sont  agreables,  iusques  a  ce  qu'il  nous  ait  monstre  ce  qu'il  demande  et  approuve.  Car  cependant  que  nous  cheminerons  a  nostre  phantasie,  nous  irons  tout  au  rebours:  et  au  lieu  de  nous  advancer,  nous  reculerons.  Voila  pour  un  item.  Et  puis  pour  le  second,  quand  nous  aurons  tout  fait,  encores  Dieu  n'est  rien  oblige  a  nous.  Qu'est-ce  qu'il  nous  doit?  Tout  ce  que  nous  pouvons  donc  esperer,  c'est  de  la  promesse  qu'il  nous  fait,  quand  il  vient  entrer  en  paction  avec  nous,  et  qu'il  nous  declaire  que  si  nous  observons  sa  Loy,  que  ce  ne  sera  point  en  vain,  que  nous  ne  serons  point  frustrez,  que  nous  n'ayons  un  bon  salaire  envers  luy.  Quand  Dieu  nous  a  declaire  cela,  c'est  d'ou  procede  la  benediction  dont  parle  ici  Moyse:  et  c'est  aussi  ce  que  sainct  Paul  monstre  quand  il  presuppose  que  devant  la  Loy  les