21:136  Calvinus  autem,  quod  in  iis  literis  graviter  laesa  erat  evangelii  veritas  piorumque  innocentia,  pontificis  audaciam  repressit.  Fuerunt  tum  Spirae  coacta  imperii  comitia:  qua  accepta  occasione  Calvinus  libellum  edidit  de  Necessitate  reformandae  ecclesiae,  quo  haud  satis  scio  an  aut  nervosius  aut  gravius  eius  argumenti  scriptum  nostro  saeculo  editum  fuerit.  Eodem  anno  Calvinus  tum  Anabaptistas  tum  Libertinos  (in  quibus  veteres  omnes  quantumvis  portentosae  renovatae  sunt  haereses)  duobus  libellis  ita  refutavit,  ut  neminem  iis  attente  lectis  arbitrer  exstitisse  qui  vel  ab  istis  nisi  sciens  et  prudens  decipi  potuerit,  vel  si  antea  deceptus  erat,  non  ultro  in  rectam  viam  redierit.  Offensa  est  tamen  isto  libro  in  Libertinos  edito  Navarrena,  quod  ab  illius  horrendae  sectae  antesignanis  duobus  Quintino  et  Pocqueto,  quos  nominatim  Calvinus  arguerat  (rem  paene  incredibilem),  eousque  fuisset  fascinata  ut,  quum  alioquin  illorum  mysterium  non  \JB  5]  teneret,  pro  bonis  viris  illos  haberet,  ac  proinde  sese  quodammodo  per  eorum  latus  confossam  arbitraretur.  Quod  quum  intellexisset  Calvinus,  sic  illi  mira  quadam  moderatione  respondit,  ut  et  dignitatis  et  collatorum  ab  hac  Regina  in  ecclesiam  Christi  beneficiorum  memor,  ingenue  tamen  et  cordate,  ut  fortem  Dei  servum  oportuit,  nimiam  illius  in  admittendis  istiusmodi  hominibus  imprudentiam  reprehenderit  et  ministerii  sui  autoritatem  adseruerit,  effecerit  denique,  ut  horrendae  Libertinorum  sectae  homines,  qui  in  Galliam  usque  sese  effundere  coeperant,  postea  sese  intra  Hollandiae  et  proximarum  regionum  fines  continuerint.  Tot  autem  illius  anni  laboribus  defunctum  nova  rursum  certamina  sequentis  anni,  *)  eaque  longe  gravissima  exceperunt.  Nam  quasi  pestis  divinitus  immissa  exhauriendae  civitati  totique  viciniae  non  sufficeret,  usque  adeo  apud  pauperculos  nonnullos  avaritia  tum  valuit,  quorum  opera  ditiores  in  curandis  aegrotis  ac  repurgandis  aedibus  uterentur,  ut  et  horrenda2)  coniuratione  pestifero  unguine  domorum  postes  ac  limina  atque  alia  quaevis  obvia  inficerent,  unde  mox  dira  pestis  sequebatur,  et  horrendo3)  iureiurando  solenniter  concepto  inter  se  Satanae  se  manciparent,  si  sceleris  conscios  ullis  tormentis  adacti  prodidissent.  Non  pauci  tamen  partim  in  urbe,  partim  in  vicinis  regionibus  deprehensi  iustisque  suppliciis  sunt  affecti.  Sed  incredibile  dictu  est,  quantam  Genevae  et  ipsi  inprimis  Calvino  invidiam  Satan  hoc  artificio  conflarit,  quasi  scilicet  ibi  plane  ille  regnaret,  ubi  quam  maxime  oppugnabatur.  1)  MDXLV.  2)  Recentiones  add.  inita.  3)  terribili  eaedem.