6:135  ORAISON  POUR  DIRE  AU  MATIN,  EN  SE  LEVANT.  Mon  Dieu,  mon  Pere,  et  mon  Sauveur,  puis  qu'il  t'a  pleu  me  faire  la  grace  de  passer  la  nuict  pour  venir  iusque  au  iour  present:  vueilles  moy  aussi  maintenant  faire  ce  bien,  que  ie  l'employe  tout  a  ton  service:  tellement  que  ie  ne  pense,  ne  dise,  ne  face  rien,  sinon  pour  te  complaire  et  obeir  a  ta  bonne  volunte:  afin  que  par  ce  moyen  toutes  mes  oeuvres  soyent  a  la  gloire  de  ton  Nom,  et  edification  de  mes  prochains.  Et  comme  il  te  plaist  de  faire  luire  ton  Soleil  sus  la  terre,  pour  nous  esclairer  corporellement,  aussi  vueilles  moy  par  la  clairte  de  ton  Esprit  illuminer  mon  entendement  et  mon  cueur,  pour  me  diriger  en  la  droicte  voye  de  ta  iustice.  Ainsi,  a  quelque  chose  que  ie  m'applique,  que  tousiours  ma  principalle  fin  et  intention  soit  de  cheminer  en  ta  crainte,  te  servir  et  honorer,  attendant  tout  mon  bien  et  ma  prosperite  de  ta  seule  benediction:  afin  de  ne  rien  attenter  qui  ne  te  soit  agreable.  Davantage,  travaillant  tellement  pour  mon  corps  et  pour  la  vie  presente,  que  ie  regarde  tousiours  plus  loing:  assavoir,  a  la  vie  celeste,  laquelle  tu  as  promise  a  tes  enfans.  Neantmoins  qu'il  te  plaise,  et  selon  le  corps,  et  selon  l'ame,  estre  mon  protecteur,  me  fortifiant  contre  toutes  les  tentations  du  diable,  et  me  delivrant  de  tous  les  dangers  terriens  qui  me  pourroyent  advenir.  Et  pource  que  ce  n'est  rien  de  bien  commencer,  qui  ne  persevere,  vueilles  moy  non  seulement  pour  ce  iourdhuy  recevoir  en  ta  saincte  conduite,  mais  pour  toute  ma  vie,  continuant  et  augmentant  iournellement  ta  grace  en  moy,  iusque  a  ce  que  tu  m'ayes  amene  a  la  pleine  conionction  de  ton  Filz  Iesus  Christ  nostre  Seigneur,  qui  est  le  vray  Soleil  de  noz  ames,  luisant  iour  et  nuict,  sans  fin  et  a  perpetuite.  Et  afin  que  ie  puisse  obtenir  telles  graces  de  toy,  vueilles  oublier  mes  fautes1)