58:134  Dieu.  Or  notamment  il  est  dit,  Ie  suis  avec  toy:  pour  monstrer  que  quand  nous  avons  Dieu  de  nostre  coste,  cela  nous  doit  suffire,  encores  que  tout  le  monde  machine  nostre  ruine,  qu'autant  qu'il  y  a  d'hommes  ce  soient  autant  d'ennemis,  qu'il  semble  mesme  que  toutes  creatures  aient  complote  contre  nous:  moiennant  que  Dieu  tiene  nostre  parti,  que  cela  soit  pour  nous  faire  surmonter  toute  crainte.  Et  de  fait  nous  voyons  comme  David  a  pratique  ceste  doctrine,  et  S.  Paul  aussi  nous  en  donne  exemple,  Puis  que  Dieu  est  pour  moy,  dit-il,  ie  ne  craindray  pas,  encore  que  ie  fusse  assiege  de  cent  mille  hommes:  quand  ie  verroie  toutes  les  mors  du  monde,  ie  me  tiendray  asseure  de  la  seule  houlette  de  Dieu.  Voila  comme  il  en  parle  au  Pseaume  vingt  troisieme,  Seigneur,  ta  houiette,  c'est  a  dire,  le  baston  que  tu  dresseras  comme  un  berger  (car  il  prendra  la  similitude  d'un  berger,  qui  aura  son  baston,  et  sa  houlette,  pour  conduire  ses  brebis),  Seigneur,  dit-il,  moyennant  que  i'aye  quelque  signe  pour  me  declarer  que  tu  me  tiens  de  ton  troupeau,  ie  chemineray  en  l'obscurite  de  la  mort,  et  me  resiouiray  cependant:  car  ie  me  tiendray  assez  console,  moyennant  que  ie  soie  fonde  sur  ta  grace.  Et  puis  en  l'autre  passage:  Puis  que  Dieu  est  avec  moy,  ie  despiteray  tous  ceux  qui  me  viendront  assaillir.  Qu'est-ce  que  me  fera  la  chair,  moyennant  que  Dieu  tiene  mon  parti?  dit-il.  Il  se  moque  la  de  la  fragilite  des  hommes,  monstrant  que  Dieu  en  soufflant  dessus,  les  pourra  tous  renverser  et  aneantir:  et  cependant,  s'il  est  muni  de  la  vertu  d'enhaut,  que  toutes  les  menaces  que  Satan  lui  pourra  intenter,  ne  seront  rien.  Et  c'est  ce  que  saint  Paul  nous  remonstre,  Si  Dieu  est  pour  nous,  qui  sera  a  l'encontre?  Non  pas  que  nous  n'aions  beaucoup  de  contrarietez,  encores  que  Dieu  soit  gardien  de  nostre  vie:  mais  cependant  nous  pouvons  nous  glorifier  contre  tous  nos  ennemis,  et  contre  tout  ce  que  le  diable  nous  brassera,  moyennant  que  Dieu  nous  soit  favorable.  Ainsi,  ce  n'est  point  sans  cause  que  ce  mot  est  couche,  pour  oster  toute  crainte,  quand  il  dit,  Ie  suis  avec  toy,  ne  crain  point  donc.  Or  tout  ainsi  que  nous  sommes  enseignez  de  nous  reposer  en  la  seule  bonte  de  Dieu,  et  en  sa  faveur  paternelle:  aussi  aucontraire  nous  avons  a  retenir,  que  sans  cela  il  faut  que  nous  soions  tousiours  comme  gens  transis.  Et  c'est  aussi  ce  que  nous  avons  touche  n'agueres:  assavoir  que  si  Dieu  ne  nous  testifioit  l'amour  qu'il  nous  porte,  quand  nous  serions  en  un  paradis  terrestre,  nous  serions  en  un  enfer:  et  aucontraire,  si  nous  estions  en  quelque  enfer,  c'est  a  dire  comme  en  un  gouffre,  moiennant  que  nous  sentions  que  Dieu  nous  est  propice,  et  qu'il  aura  en  la  fin  pitie  de  nous,  et  que  nous  soions  asseurez  de  son  aide,  un  enfer  deviendra  tousiours  paradis.  Voila  donc  ce  que  nous  avons