21:134  omittam,  quos  in  ipsis  leonum  faucibus  versantes  undiquaque  missis  literis  solabatur.  Accessit  eo  anno  duplex  aliud  maximum  malum,  annonae  videlicet  caritas  et  pestis  plerumque  illius  comes.  Erat  autem  haec  iam  tum  Genevae  consuetudo,  ut  peste  laborantes  suum  extra  urbem  nosocomium  haberent  :  ubi  quum  pastoris  constantis  ac  seduli  opera  requireretur,  plerisque  contagionis  periculum  detrectantibus,  tres  sese  obtulerunt,  Calvinus  videlicet,  Sebastianus  Castellio  (de  quo  postea  plura  [B  4]  dicturi  sumus),  et  Petrus  quidam  Blanchetus:  inter  quos  sortitione  facta,  quum  Castellio,  cui  sors  obtigerat,  mutata  nihilominus  sententia  subire  hoc  onus  impudenter  detrectaret,  Calvinum  invitum  *)  senatus  ipseque  adeo  Blanchetus,  hoc  onus  in  se  recipiens,  amplius  sortiri  prohibuerunt.  Tum  quoque  alia  gravia  inciderunt.  Nam  et  Petrum  Tossanum  Monsbelgardensem  pastorem  exercebat  controversia  de  coena  Domini,  et  Basileae  quoque  non  deerant,  qui  ecclesiasticae  disciplinae  vix  iacta  fundamenta,  frustra  in  contrarium  laborante  Myconio,  subruerent,  qui  duo  consilia  cum  Calvino  conferebant  Apud  Mediomatrices  autem  sive  Metenses  etsi  Farellus  eo  evocatus  feliciter  laborabat,  opus  tamen  Domini  partim  aperta  vi,  partim  per  apostatam  Petrum  Caroli,  cuius  antea  meminimus,  valde  impediebatur.  Quibus  in  rebus  quantum  scribendo,  monendo,  hortando,  modis  omnibus  denique  laborarit  Calvinus,  partim  ex  eius  editis  literis  intelligi  potest,  partim  vero  qui  sunt  adhuc  superstites  testificantur.  Sed  et  audacior  quam  unquam  antea  Sorbona  Petri  Liseti,  tum  in  Parlamento  Parisiensi  principis,  infaustae  infelicisque  memoriae  hominis  favore,  ausa  fuit  facinus,  quod  mirum  videri  posset  episcopos  aut  ipsum  saltem  pontificem  pati  potuisse,  nisi  iampridem  ecclesiarum  opibus  inter  se,  ut  inter  praedones  fieri  solet,  dispertiendis  occupati  suo  praecipuo  munere,  quod  in  administratione  verbi  positum  esset,  ultro  bonis  istis  quos  vocant  doctoribus  cessissent:  ea  tamen  conditione,  ut  tanquam  canes  dominis  illis  suis  subserviant,  ex  quorum  mensis  ossa  tandem  millies  abligurita  corrodunt.  Ausa  fuerat  igitur  Sorbona,  nullo  neque  divino  neque  humano  iure  fulta,  fidei  christianae  articulos  praescribere,  eiusmodi  quidem,  ut  tum  sua  falsitate,  tum  illis  summis  ineptiis,  quae  sunt  illi  sodalitati  familiares,  omnem  sibi  ipsis  autoritatem  apud  homines  non  prorsus  amentes  merito  derogare  potuerint:  quibus  tamen  alii  metu,  alii  per  imperitiam  ultro  subscripserant.  Itaque  respondit  iis  Calvinus,  ita  ut  et  errores  solidis  rationibus  pererudite  refutaret,  et  eorundem  stultitiam  omnibus  non  penitus  insulsis  suaviter  deridendam  propinaret.  1)  licet  ultro  se  offerentem.  Edd.  recenti.  9*