58:132  posite,  quand  il  plaist  a  Dieu  de  nous  declarer  que  il  nous  aime,  et  que  nous  sommes  en  sa  protection,  que  nous  ne  pouvons  perir,  qu'il  ne  nous  tiene  la  main,  et  que  nous  ne  soions  gardez  de  lui.  Voila  qui  nous  doit  contenter,  quand  tout  le  reste  nous  defaudroit.  Ainsi  donc,  combien  que  Dieu  eust  donne  quelque  signe  a  Isaac  qu'il  l'avoit  regarde  en  pitie:  cela  n'estoit  rien,  en  comparaison  de  ce  que  Moyse  recite  maintenant:  C'est,  que  Dieu  lui  est  apparu,  afin  de  continuer  son  Alliance  envers  lui,  et  de  la  ratifier  tant  plus,  et  qu'il  en  fust  tout  persuade,  en  sorte  que  ce  lui  fust  un  bouclier,  pour  repousser  toutes  tentations.  Mais  en  premier  lieu  nous  avons  a  noter,  que  ceste  vision  a  este  pour  preparer  Isaac,  afin  que  la  parole  qui  lui  devoit  estre  donnee,  fust  receue  de  lui  en  tant  plus  grande  reverence  et  authorite.  Or  ceste  vision  a  este  comme  un  signe  que  Dieu  parloit:  et  ceci  a  este  tousiours  bien  necessaire,  car  nous  savons  comme  le  diable  tasche  a  nous  seduire  par  illusions  et  vaines  fantasies.  Quand  donc  les  Peres  ont  este  enseignez,  afin  d'avoir  pleine  certitude  en  leur  Foy,  il  falloit  que  la  Maieste  de  Dieu  se  manifestast  a  eux,  et  qu'ils  en  eussent  quelque  impression  infallible:  car  si  seulement  la  parole  leur  fust  venue,  ce  eust  este  comme  un  son  en  l'air,  qui  n'eust  eu  nulle  fermete.  Ce  n'est  donc  point  chose  superflue,  quand  Moise  dit,  que  Dieu  s'est  monstre  et  declare  a  Isaac:  car  il  a  falu  qu'Isaac  cognust  et  fust  bien  persuade  que  la  parole  qu'il  oyoit  procedoit  du  ciel,  et  qu'il  s'y  pouvoit  arrester,  que  c'estoit  une  verite  certaine,  en  laquelle  il  ne  pouvoit  pas  estre  abuse.  Vray  est  que  Dieu  est  invisible,  et  ne  se  comprend  pas:  et  tant  s'en  faut  que  nous  le  puissions  voir  a  l'oeil,  que  quand  nous  y  appliquerons  tous  nos  sens,  il  est  certain  que  nous  n'atteindrons  iamais  a  sa  hautesse.  L'essence  de  Dieu  donc,  selon  qu'elle  est  infinie,  ne  se  peut  voir  des  hommes:  mais  cela  n'empesche  point  qu'il  ne  se  monstre  comme  il  nous  est  expedient,  et  selon  la  mesure  petite  qui  est  en  nous.  Ainsi,  toutesfois  et  quantes  que  nous  lisons  que  Dieu  est  apparu  aux  Peres  anciens,  ce  n'est  pas  qu'ils  aient  comprins  toute  sa  Maieste  et  son  essence  :  cela  seroit  impossible,  l'esprit  de  l'homme  est  trop  rude:  mais  il  s'est  monstre  comme  ils  l'ont  peu  porter:  c'est  assavoir,  comme  il  a  veu  quil  leur  estoit  utile.  Et  mesme  quand  Dieu  desploieroit  sa  gloire  envers  nous,  ce  seroit  pour  nous  abysmer  incontinent:  ie  di  si  nous  avions  beaucoup  plus  d'intelligence  que  nous  n'avons,  et  que  nostre  esprit  comprinst  cent  fois  plus  qu'il  ne  fait:  si  est-ce  qu'encores  serions-nous  tellement  estonnez  de  la  gloire  de  Dieu,  que  nous  demeurerions  la  confus.  Il  faut  donc  que  Dieu  regarde  a  nostre  portee,  quand  il  lui  plaist  de  nous  apparoistre.  Et  ainsi,  voila  comme  se  doit  prendre  ce  mot  que  met  ici  Moyse: