27:132  si  nous  luy  obeissions  comme  il  le  commande,  rien  ne  nous  defaudroit,  nous  sentirions  en  ceste  vie  terrestre  comme  il  nous  attire  au  salut  eternel:  que  comme  il  est  la  fontaine  de  tout  bien,  il  nous  eslargiroit  telle  abondance  que  nous  aurions  tout  a  souhait,  que  nous  passerions  par  ce  monde  comme  en  un  paradis  terrestre,  et  apres  l'heritage  des  cieux  nous  seroit  tout  appreste.  Voila  comme  Dieu  s'offre  a  nous  en  sa  Loy  :  mais  c'est  sous  ceste  condition:  Si  nous  faisons  ce  qu'il  commande.  Or  tant  s'en  faut  que  nous  le  facions,  que  nous  tirons  tout  au  contraire:  il  n'y  a  ne  pensee  ni  affection  en  nous  qui  ne  soit  ennemie  a  Dieu,  et  a  sa  iustice.  Au  lieu  donc  de  iouir  des  graces  qu'il  nous  avoit  promises  en  sa  Loy,  il  faut  qu'il  nous  soit  ennemi,  qu'il  s'arme  contre  nous,  et  que  nous  soyons  minez,  iusqu'a  ce  qu'il  nous  consomme  pleinement.  Quelquefois  il  foudroyera  en  telle  sorte  qu'en  une  minute  nous  sommes  accablez.  Et  d'ou  vient  cela?  Et  il  le  faut.  Car  comme  i'ay  desia  dit:  Dieu  s'estoit  monstre  liberal  envers  nous,  et  nous  avoit  desploye  ses  grands  thresors.  Mais  quoy?  Nos  coeurs  sont  clos  et  fermez.  Il  faut  donc  que  nous  en  soyons  privez,  et  qu'il  nous  face  sentir  la  peine:  qu'estans  affligez  nous  gemissions,  et  soyons  en  angoisse  extreme,  ne  sachans  plus  que  devenir.  Cependant  si  nous  sommes  des  siens,  encores  ne  laisse-il  pas  de  tousiours  mesler  quelque  douceur  parmi  les  corrections  qu'il  nous  envoye.  Il  est  vray  qu'il  supporte  les  meschans,  et  qui  sont  reprouvez  du  tout:  mais  si  est-ce  qu'en  la  fin  il  leur  est  terrible,  et  ne  les  traitte  pas  comme  ceux  qu'il  veut  reserver  a  soy:  combien  que  de  nature  nous  luy  soyons  tous  rebelles,  encores  ne  laisse-il  point  d'avoir  pitie  de  nous:  et  combien  que  nous  sentions  les  coups  rudes  de  sa  main,  si  est-ce  que  parmi  cela  encores  monstre-il  qu'il  ne  nous  veut  pas  pleinement  exterminer.  Or  en  la  fin  tant  y  a  que  nous  demeurerions  tousiours  en  nos  vices,  et  y  pourririons,  sinon  qu'il  suscitast  le  David  qu'il  a  promis,  c'est  nostre  Seigneur  Iesus  Christ.  Et  ainsi  par  son  moyen  nous  recouvrons  ce  que  nous  avons  perdu  par  nos  vices,  que  voila  Iesus  Christ  qui  nous  met  en  possesion  de  l'heritage  qui  nous  avoit  este  promis  par  la  Loy:  mais  il  ne  nous  pouvoit  point  appartenir,  et  en  eussions  este  frustrez,  sinon  qu'en  Iesus  Christ,  comme  il  nous  a  rachetez  en  nos  personnes,  aussi  les  biens  de  Dieu  son  Pere  nous  fussent  communiquez.  Nous  recouvrons  donc  tout  cela  en  luy,  au  lieu  qu'au  paravant  toute  la  iouissance  nous  en  estoit  ostee  et  retranchee.  Ainsi,  notons  bien  que  quand  Dieu  avoit  fait  tant  de  promesses,  et  si  amples  aux  Iuifs  en  sa  Loy,  sous  ceste  condition:  S'ils  gardoyent  ses  commandemens,  qu'il  a  voulu  monstrer  que  cela  n'a  point  eu  lieu,  ius-