52:130  periclitaretur,  posthabita  sui  ratione,  illis  prospicit  Tychicum  ad  eos  mittendo,  in  quo  elucet  tam  singularis  sancti  apostoli  zelus,  quam  prudentia.  Neque  enim  hoc  parum  est,  quod  dum  captivus  tenetur  et  versatur  in  extremo  discrimine  ob  evangelium,  non  tamen  cessat  quin  promovendo  evangelio  incumbat,  curet  omnes  ecclesias.  Ita  corpus  quidem  est  inclusum,  sed  animus  ad  satagendum  sollicitus  se  longe  lateque  diffundit.  Prudentiae  est,  quod  idoneum  mittit  hominem  et  cordatum  qui  eos  confirmet  quantum  opus  erat,  et  pseudoapostolorum  astutiae  resistat:  deinde  quod  Epaphram  apud  se  retinet,  donec  perspexerint  qualis  et  quantus  in  doctrina  consensus  foret  inter  omnes  veros  doctores:  idemque  audierint  a  Tychico  quod  prius  ab  Epaphra  didicerant.  Haec  exempla  diligenter  meditemur,  ut  nos  accendant  ad  imitationem  similis  studii.  Addit  Onesimum,  quo  plus  habeat  ponderis  legatio.  Quamquam  incertum  est  quis  fuerit  hic  Onesimus.  Nam  vix  est  credibile,  hunc  esse  servum  illum  Philemonis,  quia  furis  et  fugitivi  nomen  dedecori  subiectum  fuisset.  Ambos  ornat  honestis  titulis,  quo  magis  prosint:  ac  Tychicum  praesertim,  qui  docendi  munere  functurus  erat.  10.  Salutat  vos  Aristarchus,  concaptivus  meus,  et  Marcus  cognatus  Barnabae:  de  quo  acceptistis  mandata,  si  venerit  ad  vos,  ut  suscipiatis  ipsum:  ll.  et  Iesus,  qui  dicitur  Iustus:  qui  sunt  ex  circumcisione,  hi  soli  cooperarii  in  regnum  Dei,  qui  mihi  fuerunt  solatio.  12.  Salutat  vos  Epaphras,  qui  est  ex  vobis  servus  Christi,  semper  decertans  pro  vobis  in  precationibus:  ut  stetis  perfecti  et  completi  in  omni  voluntate  Dei.  13.  Testimonium  enim  Uli  reddo,  quod  multum  studium  vestri  habeat,  et  eorum  qui  sunt  Laodiceae  et  Hierapoli.  10.  Concaptivus.  Hinc  apparet,  accessisse  alios  Paulo,  postquam  Romam  fuit  perductus.  Et  credibile  est,  in  hoc  incubuisse  hostes  principio  ut  periculi  societate  absterreant  omnes  pios  ab  ipso  iuvando,  idque  ad  tempus  valuisse:  postea  collectis  animis  quosdam  sprevisse  quidquid  terroris  obiiciebatur.  Ut  suscipiatis  ipsum.  Nonnulli  codices  habent:  Suscipite,  imperativo  modo:  sed  perperam.  Exprimit  enim  speciem  illius  mandati  quod  acceperant  Colossenses:  nempe  quod  fuerit  commendatio  vel  Barnabae,  vel  Marci:  quod  secundum  probabilius  est.  Graece  est  modus  infinitivus,  sed  qui  sic  resolvi  debet  ut  posui.  Observemus  autem,  sedulos  fuisse  in  reddendis  testimoniis:  ut  probos  viros  a  falsis  fratribus,  a  fucis,  ab  impostoribus,  et  multis  erronibus  discernerent.  Quae  sollicitudo  hodie  plusquam  necessaria  est:  sive  quod  frigide  excipiuntur  probi  doctores,  sive  quod  impostoribus  creduli  et  stulti  homines  nimis  liberaliter  sunt  expositi.