48:13  13  CAPUT  L  14  trahant.  Alterum  vero  consolationis  vice  mox  additur,  de  secundo  eius  adventu.  Ex  his  duobus  simul  coniunctis,  et  ex  utrovis  seorsum,  firmum  argumentum  ducitur  ad  refutandos  papistas  et  quosvis  alios,  qui  carnalem  in  panis  et  vini  symbolis  Christi  praesentiam  imaginatione  sua  statuunt.  Nam  quum  assumptus  in  coelum  dicitur  Christus,  certe  aperte  notatur  locorum  distantia.  Fateor  quidem  coeli  nomen  variis  modis  accipi:  nunc  pro  aere,  nunc  pro  toto  sphaerarum  complexu,  nunc  pro  glorioso  Dei  regno,  ubi  Dei  maiestas  propriam  habet  sedem  utcunque  totum  mundum  impleat.  Qua  ratione  Paulus  Christum  supra  coelos  omnes  collocat,  quia  mundo  sit  superior  et  in  illo  quoque  beatae  immortalitatis  domicilio  supremum  gradum  obtineat:  quia  supra  omnes  angelos  eminet,  quorum  est  caput.  Sed  hoc  non  obstat,  quominus  absit  a  nobis,  et  coelorum  nomine  separatio  a  mundo  signetur.  Quantumlibet  cavillentur,  coelum  quo  sublatus  est  Christus  universae  mundi  machinae  opponi,  planum  est.  Ergo  ut  in  coelo  sit,  extra  mundum  esse  oportet.  Verum  in  primis,  quo  intendant  angeli,  spectandum  est:  nam  inde  certius  de  verborum  sensu  fiet  iudicium.  Revocare  volunt  angeli  discipulos  a  carnalis  praesentiae  desiderio.  In  hunc  finem  non  nisi  secundo  venturum  denuntiant.  Nam  huc  pertinet  temporis  illius  designatio,  ne  frustra  ante  venturum  exspectent.  Quis  non  videt  iisdem  verbis  corporis  eius  absentiam  e  mundo  exprimi?  Quis  non  videt  prohiberi,  ne  in  terra  habere  expetamus?  Arguto  sophismate  elabi  se  putant,  quum  dicunt  tunc  visibili  forma  venturum:  nunc  autem  quotidie  invisibilem  venire.  Sed  hic  de  forma  non  est  disputatio:  tantum  admonentur  apostoli,  sinendum  esse  in  coelo  Christum,  donec  extremo  die  appareat.  Votum  enim  corporeae  praesentiae  tanquam  absurdum  et  perversum  damnatur.  Negant  carnalem  esse  carnis  praesentiam,  dum  gloriosum  corpus  supernaturali  modo  et  per  miraculum  nobis  adest:  sed  eorum  commenta  de  corpore  glorioso,  tanquam  ludicra  et  puerilia,  respuere  licet.  Miraculum  sibi  fingunt  ipsi,  nullo  scripturae  testimonio.  Iam  gloriosum  erat  Christi  corpus,  dum  a  resurrectione  versatus  est  cum  suis  discipulis.  Id  extraordinaria  et  arcana  Dei  virtute  factum  est.  Eo  tamen  modo  angeli  posthac  desiderari  vetant  et  negant  ad  homines  venturum  esse.  Ergo,  iuxta  eorum  praeceptum,  ne  eum  e  coelo  figmentis  nostris  detrahamus  :  nec  manibus  aut  reliquis  sensibus  magis  quam  oculis  putemus  fore  nobis  praesentem.  De  corpore  semper  loquor.  Nam  quod  infinitum  esse  dicunt,  ut  absurdum  somnium  est,  ita  secure  repudiandum.  Interea  libenter  fateor,  Christum  adscendisse,  ut  impleat  omnia:  sed  diffusum  ubique  esse  dico,  spiritus  sui  virtute,  non  carnis  essentia.  Fateor  praeterea  et  verbo  et  sacramentis  eum  nobis  adesse,  Neque