41:13  13  IN  DANIELEM.  CAP.  VI.  14  iam  diximus  non  potuisse  effugere  hoc  discrimen,  quin  oblique  deficeret  a  Deo.  Nam  statim  fuisset  illi  exprobratum,  Cur  desinis  a  solito  tuo  more?  Cur  claudis  fenestras?  Cur  non  audes  Deum  tuum  precari?  Satis  ergo  apparet  te  pluris  facere  regem,  quam  Dei  reverentiam  et  metum.  Quoniam  ergo  sic  diminutus  fuisset  honor  Dei,  Daniel  sponte,  quemadmodum  iam  vidimus,  obtulit  se  quasi  sacrificium  ad  mortem.  Hoc  etiam  exemplo  docemur,  semper  filiis  Dei,  quamlibet  circumspecte  agant  et  modeste  se  gerant,  paratas  esse  insidias.  Sed  ita  prudenter  gerere  se  debent,  ut  interea  non  sint  nimium  astuti,  vel  nimium  providi:  hoc  est,  ne  ita  suae  securitati  caveant  ut  interim  obliviscantur  quid  requirat  Deus,  et  quam  pretiosum  sit  ei  suum  nomen,  et  quam  necessaria  sit  fidei  confessio,  in  loco  scilicet  et  tempore.  Nunc  sequitur,  12.  Tunc  accesserunt  et  dixerunt  (et  loquuti  sunt)  coram  rege  super  edicto  regio,  Annon  edictum  obsignasti,  ne  quisquam  homo  peteret  ab  ullo  deo  vel  homine,  usque  ad  triginta  dies  (hos)  praeterquam  abs  te,  rex  (vel,  ut  quisquis,  potius  ita  vertendum  est,  homo  peteret  ab  ullo  deo  vel  homine  asque  ad  triginta  dies  hos,  praeterquam  abs  te  rex)  proiiceretur  in  speluncam  leonum?  "Respondit  rex  ei  dixit,  Firmus  est  sermo  secundum  legem  Medorum  et  Persarum,  quae  non  transit.  Iam  proceres  Darii  tanquam  victores  accedunt  ad  regem:  sed  callide  ipsum  adoriuntur.  Neque  enim  statim  aperte  verba  de  Daniele  faciunt,  quem  sciebant  a  rege  diligi:  sed  iterum  repetunt  quod  dixerant,  non  posse  edictum  mutari,  quoniam  lex  Medorum  et  Persarum  sit  inviolabilis,  neque  possit  reddi  irrita.  Iterum  igitur,  quantum  in  se  est,  sanciunt  edictum  illud,  ne  rex  postea  sit  liber,  vel  audeat  retractare  quod  semel  mandavit.  Notanda  igitur  est  haec  calliditas,  ubi  oblique  regem  circumveniunt,  et  quasi  irretiunt,  ne  postea  liberum  sit  verbum  mutare.  Veniunt  igitur  et  verba  faciunt  de  edicto,  inquit,  regio.  Tacent  nomen  Danielis,  sed  praefantur  de  regio  edicto,  ut  regem  magis  ac  magis  obstringant.  Sequitur  regem  respondisse,  verum  esse  sermonem.  Hic  videmus,  ut  reges  cupide  affectent  laudem  constantiae:  sed  non  discernunt  inter  constantiam  et  obstinationem.  Sic  enim  reges  debent  stare  suis  edictis,  ut  tamen  non  pudeat  ipsos  retractare  quod  temere  promulgarunt.  Si  quid  ergo  inconsiderate  elapsum  est,  prudentia  et  aequitas  hoc  requirit,  ut  corrigant  errorem  suum:  ubi  autem  calcato  omni  respectu  iustitiae,  volunt  firmum  manere  quidquid  iusserunt  etiam  inconsiderate,  haec  est  summa  stultitia  neque  iam  debent  obtendere  constantiam  in  hac  pervicacia,  ut  iam  diximus.  Sed  reliqua  in  crastinum.