40:13  13  PROLEGOMENA.  putaverimus,  rationem  nobis  reddendam  minime  putamus.  Cur  vero  tibi  potius  quam  alii  cuipiam  consecraverimus,  si  quis  fortasse  roget,  ingenue  dico  me  huius  quidem  consilii  autorem  illum  ipsum  habere,  cui  de  rebus  suis  licuit  prout  libuit  decernere:  sed  idem  quoque  quod  ille  voluit,  ultro  fuisse  maximas  et  iustissimas  ob  causas  facturum.  Quas  enim  ille  in  te  absente  tum  animi  tum  corporis  summas  dotes  mirabatur  ac  plane  suspiciebat,  earum  ego  quum  et  in  pace,  et  in  bello  totis  viginti  mensibus  fuerim  oculatus  testis,  cur  tandem  illius  iudicio  non  assentirer?  Aiebat  autem  ille  se  in  his  librorum  suorum  praefationibus  insistere  Pauli  vestigiis,  qui  non  alio  praecipue  consilio  in  suis  epistolis  nominatim  aliquos  salutaret,  quam  ut  ecclesiis  certos  et  delectos  homines  veluti  spectandos  caeteris  proponeret,  quorum  videlicet  exemplis  ad  veram  pietatem  et  reliquas  virtutes  inflammarentur.  Quam  verum  autem  fuerit  illius  de  te  iudicium,  si  vel  tui  esset  pudoris  in  os  laudari,  vel  fas  esset  quaerere  ut  in  rebus  dubiis  fieri  solet,  quam  multa  et  quam  certa  testimonia  proferri  possent?  Sed  alius  erit,  et  spero,  de  his  rebus  commodior  dicendi  locus.  Aliud  nunc  agere  malo,  et  quidem  tibi  quamvis  maximo,  minime  tamen  omnium  ambitioso  viro  iucundius.  Malo  te  quantumvis  currentem  hortari,  generosissime  domine,  ut  quod  agis  hoc  ipsum  agas,  id  est  ut  te  totum,  sicut  felicissime  coepisti,  non  tantum  ad  haec  sacra  tum  assidue  legenda,  audienda  et  meditanda,  tum  etiam  re  ipsa  usurpanda,  sed  etiam  ad  ecclesias  iustis  omnibus  rationibus  tuae  isti  tum  dignitati  tum  animi  fortitudini  convenientibus,  tuendas  et  conservandas  applices.  Te  unum  praecipue  ab  iis  peti  qui  salva  religione  se  consistere  non  posse  putant,  ne  ipsi  quidem  tui  et  piorum  omnium  capitales  inimici  dissimulant.  Sed  aut  ego  te  non  novi,  aut  ista  potius  tuas  virtutes  acuunt  quam  retundunt.  Quae  sit  Deo  de  suis  defendendis  cura  tu  ipse  optime  sensisti,  ac  etiam  animadvertisti.  Ipsa  te  innocentia  et  integritas  adversus  omnes  criminationes  satis  defendit.  Habes,  si  quisquam  tui  ordinis  alius,  intus  et  in  pectore  invictum  illud  praesidium,  quod  ipsi  profani  homines  murum  aheneum  vocarunt:  bonam  conscientiam  dico,  qua  vel  una  fretus,  omnes  adversarios  facile,  mihi  crede,  superabis.  In  istis  porro  certaminibus  nihil  aeque  te  confirmabit  atque  diligens  propheticorum  scriptorum  cum  historiis  comparatio.  Ibi  enim  demum  non,  uti  homines  solent  ex  aliqua  praeteritarum  rerum  observatione,  futurarum  exitus  fallaciter  coniiciuntur,  non  consilia  dubia  capiuntur,  non  ex  ancipiti  illo  causarum  secundarum  concursu  exitus  impediuntur,  sed  quasi  Dei  ipsius  consiliis  intersis,  veras  conversionum  causas,  initia,  progressus,  exitus  intuebere,  et  eas  quidem  planas  ac  perspicue  declaratas.  Etsi  enim  habent  prophetae  sua  aenigmata,  tamen  sedulo  omnia  inter  se  comparantibus,  et  idiomatos  prophetarum  gnaris,  atque  adeo  cum  ipsis  praedictionibus  conferentibus  rerum  eventus,  omnia  sic  plana  fient,  ut  velut  e  coelis  humana  omnia  despicere  tibi  mox  videaris:  praesertim  fido  isto  duce  fretus,  qui  te  per  invia  et  inaccessa  quaevis  certo  tramite  deducat.  Neque  vero  ulla  causa  est  cur  ista  vel  ut  vulgaria  despiciantur,  vel  ut  rerum  iam  olim  obsoletarum  narrationes  contemnantur,  sicut  argutulis  hodie  quibusdam  videtur.  Neque  enim,  ut  nonnulli  putant  rerum  istarum  imperiti,  de  rebus  parvis  ac  plebeiis  agunt  prophetae:  sed  de  maximis  illis  monarchiis,  quarum  hodie  nullas  similes  habemus,  de  summorum  regum  ac  principum  statu,  de  maximarum  civitatum  et  in  pace  et  in  bello  salute  et  interitu,  sedente  pro  tribunali  magno  illo  exercituum  Deo,  in  his  libris  disceptatur  ac  decernitur.  Nec  enim  eorum  temporum  reges,  quantumvis  profani  et  impii,  idem  factitabant  quod  hodie  nonnulli,  quos  adeo  pudet  os  Domini  per  servos  suos  loquentis  interrogare,  ut  nihil  magis  caveant,  et  fidos  Dei  servos  munere  suo  fungentes  audeant  ambitionis  accusare.  Imo  nulla  tum  gens  erat,  sicut  omnes  et  sacrae  et  profanae  historiae  testantur,  quae  de  rebus  gravioribus,  inconsultis  suis  prophetis,  decerneret.  Neque  quum  haec  dico,  verbi  ministros  in  regum  aut  principum,  aut  ullorum  magistratuum  solio  colloco,  vel  quorundam  ambitioni  faveo:  sed  dico  quod  res  est,  quodque  adeo  experientia  ipsa  sero  iam  probat,  ut  te  ipsum,  generosissime  Domine,  in  tempore  animadvertisse,  atque  adeo  praedixisse  memini.  Deinde  ut  de  tem-