30:13  13  IN  L  LIB.  SAMUEL.  CAP.  XIII.  14  Domino  nostro  Iesu  Christo,  qui  hoc  ipsum  ore  suo  sacro  pronunciavit.  Deus  itaque  se  illis  verbis  ostendit  fore  favorabilem  et  propitium  omnibus  suis  fidelibus:  neque  exspectaturum  donec  gemitus  ipsorum  ad  se  perveniant,  et  in  vitae  discrimen  adducantur:  sed  se  praeventurum  eos  asseverat.  Alibi  vero  dicit  se  statim  ubi  ad  ipsum  clamaverint  manum  habiturum  ad  auxiliandum  ipsis  paratissimam.  Et  alio  loco  etiam  profitetur  se  aurem  attentissimam  ad  fidelium  preces  habiturum.  Has  omnes  promissiones  quae  passim  in  sacris  scripturis  occurrunt  si  in  unum  collegerimus,  facile  iudicabimus  Deum  non  exspectaturum  quum  in  summas  difficultates  et  angustias  inciderimus,  ut  precibus  ipsum  interpellemus,  et  auxilium  imploremus.  Verum  experientia  prorsus  contrarium  evenire  docemur  :  quandoquidem  in  extremum  vitae  discrimen  adducti  a  mane  ad  vesperam,  et  de  die  millies  ad  Deum  exclamamus,  auxilium  eius  implorantes,  et  languentes  ac  paene  deficientes  vociferamur,  et  tamen  dies  abit  sine  auxilio,  et  videtur  Deus  preces  nostras  non  audivisse.  Imo  crescentibus  malis,  videtur  potius  a  nobis  recessisse,  et  pro  auxilio  in  mortis  discrimen  coniecisse.  Verum  istis  rationibus  fieri  experimentum  patientiae  fidelium  sciendum  est.  Neque  tamen  propterea  sibi  Deum  contrarium.  Quod  si  probe  cognitum  erit  a  nobis,  minime  mirum  videbitur  quod  hic  recitatur,  nempe  Samuelem  iussisse  Saulem  se  exspectare  ;  et  tamen  non  tam  cito  venisse,  quam  Saul  sibi  persuaserat.  Verum  tamen  non  defuisse  promissis  Samuelem  certum  est,  qui  septimo  die,  ut  praedixerat,  venit,  licet  non  ea  hora  qua  exspeetabatur.  Atque  hoc  diligenter  observandum  est.  Namque  certissimum  est  Deum  nunquam  tardare,  neque  occasionem  permittere  ut  effluat:  sed  semper  opportunum  auxilium  nobis,  prout  ipse  necessarium  esse  novit  adferre.  Idcirco  dicebat  olim  Habacuc  propheta:  Veniens  veniet,  et  non  tardabit:  nimirum  si  quid  ad  salutem  nostram  faciat  intueamur,  et  officio  nostro  fungamur.  Dicit  enim  eodem  loco  propheta:  Si  moram  fecerit,  exspecta  illum.  Quamobrem  si  sensus  nostros  coercere,  et  intra  patientiae  terminos  continere  possumus,  et  exspectare  ut  Deus  providentia  sua  nos  regat  et  operetur,  certo  persuasos  esse  nos  oportet,  illum  nunquam  nobis  defuturum,  neque  auxilium  suum  tardaturum.  Sed  si  nostrae  impatientiae  locum  demus,  semper  tardare  Deum  existimabimus.  Nam  nisi  singulis  momentis  quibus  eum  invocamus,  eius  auxilium  senserimus,  semper  moram  facere  illum  arbitrabimur,  et  miris  modis  cruciabimur.  Atque  hoc  israelitico  populo  et  Sauli  contigisse  videmus  :  in  quibus  tanquam  in  speculo,  aut  imagine  viva,  possumus  ea  quae  supra  diximus  contemplari:  nempe  Deum,  si  illum  intueamur,  nunquam  deesse  nobis,