3:13  13  AU  ROY  DE  FRANCE.  point  à  ceste  fin  de  servir  à  la  gloire  de  Dieu,  n'exerce  pas  regne,  mais  brigandage.1)  Or  on  s'abuse  si  on2)  attend  longue  prosperité  en  un  regne  qui  n'est  point  gouverné  du  sceptre  de  Dieu,  c'est  à  dire  sa  saincte  parolle.  Car  l’edict  celeste  ne  peut  mentir,  par  lequel  il  est  denoncé,  que  le  peuple  sera  dissipé  quand  la  Prophetie  defaudra  (Prov.  29,  18).  Et  ne  devez  estre  destourné  par  le  contemnement  de  nostre  petitesse.3)  Certes  nous  recognoissons  assez  combien  nous  sommes  povres  gens  et  de  mespris:  c'est  assavoir  devant  Dieu  miserables  pecheurs,  envers  les  hommes  vilipendez4)  et  deiettez:  et  mesme,  si  vous  voulez,  l'ordure  et  ballieure  du  monde,  ou  si  on  peut  encore  nommer  quelque  chose  plus  vile.  Tellement  qu'il  ne  nous  resté  rien  dequoy  nous  glorifier  devant  Dieu,  sinon  sa  seule  misericorde:  par  laquelle,  sans  quelque  merite,5)  nous  sommes  sauvez:  ny  envers  les  hommes,  sinon  nostre  infirmité,  c'est  à  dire,  ce  que  tous  estiment  grande  ignominie.  Mais  toutesfois  il  faut  que  nostre  doctrine  consiste  eslevée  et  insuperable  par  dessus  toute  la  gloire  et  puissance  du  monde.  Car  elle  n'est  pas  nostre,  mais  de  Dieu  vivant  et  de  son  Christ,  lequel  le  Pere  a  constitué  Roy,  pour  dominer  d'une  mer  à  l'autre,  et  depuis  les  fleuves  iusques  aux  fins  de  la  terre  (Psal.  72,  8):  et  tellement  dominer,  qu'en  frappant  la  terre  de  la  seule  verge  de  sa  bouche  (Is.  11,  4),  il  la  casse  toute  avec  sa  force  et  sa  gloire  comme  un  pot  de  terre  (Psal.  2,  9):  ainsi  que  les  Prophetes  ont  predit  de  la  magnificence  de  son  regne,  qu'il  abbatroit  les  royaumes  durs  comme  fer  et  airain,  et  reluisans  comme  or  et  argent  (Dan.  2,  32).  Bien  est  vray,  que  noz  adversaires  contredisent,  reprochans  que  faussement  nous  pretendons  la  parolle  de  Dieu,  de  laquelle  nous  sommes,  comme  ils  disent,  pervers  corrupteurs.  Mais  vous-mesme,  selon  vostre  prudence,  pourrez  iuger  en  lisant  nostre  confession,  combien  ceste  reproche  est  pleine