25:13  13  SANCTIONES  A  PROMISSIONIBUS  ET  MINIS.  14  Dei  cultores  ex  observatione  legis,  et  quales  poenae  transgressores  maneant.  Antehac  quidem  admonui,  quidquid  nobis  promittit  Deus,  si  in  praeceptis  eius  ambulemus,  fore  irritum  si  opera  nostra  summo  iure  examinet.  Hinc  fit  ut  legalibus  pactis  renunciandum  sit,  si  quid  cupimus  gratiae  apud  Deum  consequi.  Verum  quia  fidelium  opera,  utcunque  vitiosa  sint,  intercedente  venia  nihilominus  placent  Deo:  inde  etiam  pendet  promissionum  effectus,  dum  conditio,  quae  in  lege  praecisa  est,  temperatur.  Ergo  dummodo  aspirent  et  conentur,  eorum  studio,  quamvis  imperfecto,  perinde  rependitur  merces  ac  si  in  solidum  officio  defuncti  essent.  Nam  quia  fide  sepeliuntur  eorum  vitia,  quod  gratuito  largitur  Deus,  mercedis  nomine  commendat.  Ergo  ambulare  in  praeceptis  Dei,  non  praecise  tantundem  hic  valet  ac  praestare  quidquid  lex  imperat:  verum  sub  hoc  verbo  includitur  Dei  indulgentia,  qua  filios  suos  tolerat,  eorumque  vitiis  ignoscit.  Ideoque  apud  fideles  fructu  non  caret  promissio,  dum  ex  animo  student  se  Deo  consecrare,  quamvis  a  perfectione  adhuc  longe  absint:  secundum  prophetae  doctrinam:  Parcam  illis,  quemadmodum  pater  filio  parcit  dum  servit  ei  (Malac.  3,17)  :  ac  si  diceret,  eorum  obsequium  non  quia  mereatur  sibi  fore  gratum,  sed  quia  illud  paterno  favore  prosequetur.  Unde  apparet  quam  stulta  imaginatione  superbiant  qui  Deum  quasi  ex  pacto  sibi  facere  volunt  debitorem.  Quod  autem  remuneratio  cuius  nunc  fit  mentio,  fere  restringitur  ad  terrenam  et  caducam  vitam,  pars  est  legalis  paedagogiae.  Sicuti  enim  veteri  populo  sub  umbra  et  imagine  proposita  fuit  spiritualis  Dei  gratia,  ita  eadem  ratio  tam  in  poenis  quam  in  praemiis  valuit.  Reconciliatio  cum  Deo  sanguine  pecudum  repraesentata  fuit,  variae  fuerunt  expiationum  formae  :  sed  tantum  externae  et  visibiles,  quia  nondum  in  Christo  apparuerat  veritas.  Eadem  igitur  de  causa,  quia  nondum  tam  luculenta  et  familiaris  vitae  aeternae  et  ultimae  resurrectionis  patribus  obtigerat  cognitio,  ut  nunc  in  evangelio  refulget,  Deus  externis  documentis  ut  plurimum  ostendit  se  vel  propitium  esse  vel  offensum  populo  suo.  Quia  hodie  non  palam,  ut  olim,  scelera  Deus  ulciscitur:  colligunt  fanatici  homines  eum  prope  mutasse  naturam.  Imo  hoc  praetextu  Manichaei  finxerunt  deum  Israelis  diversum  a  nostro.  Hic  autem  error  ex  crassa  et  turpi  inscitia  nascitur:  quia  dum  modum  agendi  non  discernunt,  Deum  ipsum  impie  discerpere  non  dubitant.  Terra  hodie  non  dehiscit  ut  rebelles  absorbeat:  non  fulminat  e  coelo  Deus  sicuti  adversus  Sodomam:  non  accendit  ignem  in  urbibus  sceleratis,  sicuti  olim  in  castris  Israelitarum:  non  ebulliunt  immissi  serpentes  qui  lethales  morsus  infligant:  denique  non  versantur  quotidie  ante  oculos  tam  manifesta  poenarum  exempla,  quae  Deum  formidabilem  ostendant:  nempe