2:13  PRAEFATIO  AB  REGEM  GALLIAE.  matam  esse  voluit  (Rom.  12,  6),  certissimam  amussim  posuit  qua  probari  scripturae  interpretatio  debeat.  Ad  hanc  itaque  fidei  regulam  si  nostra  exigantur,  in  manibus  est  victoria.  Quid  enim  melius  atque  aptius  fidei  convenit  quam  agnoscere  nos  omni  virtute  nudos,  ut  a  Deo  vestiamur?  omni  bono  vacuos,  ut  ab  ipso  impleamur?  nos  peccati  servos,  ut  ab  ipso  liberemur?  nos  caecos,  ut  ab  ipso  illuminemur?  nos  claudos,  ut  ab  ipso  dirigamur?  nos  debiles,  ut  ab  ipso  sustentemur?  nobis  omnem  gloriandi  materiam  detrahere,  ut  solus  ipse  gloriosus  emineat  et  nos  in  ipso  gloriemur?  Haec  atque  id  genus  reliqua  quum  a  nobis  dicuntur,  interpellant  illi,  quiritanturque  hoc  modo  subverti  caecum  nescio  quod  lumen  naturae,  fictas  praeparationes,  liberum  arbitrium,  et  meritoria  salutis  aeternae  opera,  cum  suis  etiam  supererogationibus;  quia  ferre  non  possunt  integram  omnis  boni,  virtutis,  iustitiae,  sapientiae,  laudem  ac  gloriam  apud  Deum  residere.  At  non  legimus  reprehensos  qui  nimium  e  fonte  aquae  vivae  hauserint;  contra  graviter  obiurgantur  qui  foderunt  sibi  puteos,  puteos  contritos,  et  qui  continere  aquam  non  valent  (Ier.  2,  13).  Rursum  quid  fidei  convenientius  quam  Deum  sibi  polliceri  propitium  patrem,  ubi  Christus  frater  ac  propitiator  agnoscitur?  quam  omnia  laeta  ac  prospera  secure  ab  eo  exspectare,  cuius  inenarrabilis  erga  nos  dilectio  eo  progressa  est  ut  proprio  filio  non  pepercerit  quin  pro  nobis  ipsum  traderet?  quam  in  certa  exspectatione  salutis  et  vitae  aeternae  acquiescere,  ubi  Christus  a  patre  datus  cogitatur,  in  quo  tales  thesauri  sunt  absconditi?  Hic  nobis  manum  iniiciunt,  et  illam  fiduciae  certitudinem  arrogantia  et  praesumptione  non  carere  clamant.  At,  ut  nihil  de  nobis,  ita  omnia  de  Deo  praesumenda  sunt.  Nec  alia  ratione  vana  gloria  spoliamur,  nisi  ut  in  Domino  discamus  gloriari.  Quid  ultra?  Percurre,  fortissime  Rex,  omnes  nostrae  causae  partes,  et  quovis  sceleratorum  hominum  genere  nequiores  nos  existima,  nisi  plane  comperias,  in  hoc  nos  laborare  et  probris  affici  quia  spem  reponimus  in  Deo  vivo  (1  Tim.  4,  10);  quia  hanc  credimus  esse  vitam  aeternam,  nosse  unum  verum