13:13  13  1548  IUL.  14  1051,  VIRETUS  BULLINGERO.  Transmittit  ei  literas  Calvini.  Plura  ipse  ad  Gualtherum.  Si  quid  forte  durius  dictum  videatur,  ne  velint  offendi.  (Ex  autographo  Archiv.  Turic.  Plut.  VI.  vol.  166,  olim  Epp.  Tom.  24,  fol.  238.  -  Simler.  Vol.  67.)  Clarissimo  viro  D.  Henricho  Bullingero  Tigurinae  ecclesiae  pastori  vigilantissimo,  fratri  et  symmystae  plurimum  observando.  Tiguri.  8.  Dedi  huic  tabellario  literas  Calvini1)  ad  te,  quas  huc  ad  me  miserat  ut  ad  te  perferendas  curarem.  Quia  vero  eum  existimo,  quum  suis  literis,  tum  vero  eo  quod  nuper  vobiscum  habuit  colloquio  Tiguri,  de  rebus  nostris  fecisse  vos  certiores  abunde,  et  quia  super  eadem  re  scribo  satis  prolixas  et  molestas  literas  ad  D.  Uodulphum  Gualtherum,2)  veterem  amicum  et  familiarem  meique  amantissimum,  non  putavi  operae  pretium  ut  iisdem  de  rebus  saepius  te  obtunderem.  Quandoquidem,  praeterquam  quod  invitus  hanc  causam  ago,  in  qua  necessitate  cogor  eorum  patefacere  dedecora  quos  mihi  gratius  esset  laudibus  ad  coelum  vehere,  huc  accedit  quod,  si  quid  est  in  longa  mea  epistola  quod  tua  te  scire  referat,  non  dubito  quin  D.  Gualtherus  id  tibi  familiariter  communicet,  praesertim  quum  non  ignorem  quae  sit  inter  vos  amicitia  et  necessitudo.  Quod  si  quid  in  ea  videbitur  vobis  durius  aut  asperius  dictum,  ne  offendamini,  obsecro:  quia  certo  scio  vos  ea  omnia  levia  nimis  iudicaturus  fuisse,  si  in  eadem  essetis  nobiscum  causa,  aut  si  exacte  vobis  cognita  esset  rei  indignitas  et  iniuria,  quae  non  nobis  solum  sed  toti  irrogata  est  ecclesiae,  ab  iis  quibus  et  nostra  et  ecclesiae  salus  inprimis  curae  esse  debuit.  Sed  postquam  visum  fuit  Domino  sic  nos  exercere,  te  et  omnes  tuos  collegas  et  symmystas  per  Christum  Iesum  obsecro,  et  commune  ministerium,  ut  detis  operam  his  fluctibus  compescendis  quos  nobis  tam  exitiales  commovit  quorundam  importunitas  et  improbitas,  nisi  velitis  nostras  ecclesias  maximis  exponi  discriminibus  hoc  praesertim  tempore,  quo  nusquam  ecclesiae  ulla  certa  quies  inveniri  potest.  Praestate  vos  quod  estis,  hoc  est,  pacis  et  concordiae  studiosos.  Salutant  te  et  tuos  collegas  nostri  omnes  officiosissime.  Quum  plus  otii  nactus  fuero,  tuis  literis  latius  respondebo,  si  id  res  postulat,  quarum  tibi  nomine  gratias  ago  1051.  1)  N.  1039.  2)  Deperditas.