50:129  129  CAPUT  XL  136  eminere,  nihil  illis  relinquit  in  quo  mereantur  quidquam  laudis.  Erat  illud  in  speciem  laudabile,  contemnere  pecuniam.  Sed  fucum  eos  facere  dicit  quo  decipiant:  quemadmodum  si  meretrix  ornatum  honestae  matronae  mutuetur.  Detrahenda  enim  erat  larva,  quae  Dei  gloriam  obscurabat.  Dolosi  sunt  operarii,  inquit,  hoc  est,  non  produnt  suam  nequitiam  primo  adspectu,  sed  astute  obrepunt  honesto  praetextu.  Itaque  diligenter  et  penitus  sunt  excutiendi:  ne  simul  atque  refulserit  color  aliquis  virtutis,  illos  pro  veris  Christi  servis  amplectamur.  Nec  vero  livore  vel  invidia  in  sinistram  partem  torquet  Paulus  quod  virtutis  loco  censeri  poterat,  sed  eorum  improbitate  coactus  malum  occultum  detegit:  quia  noxia  erat  virtutis  profanatio,  quod  se  fingebant  maiore  quam  omnes  Christi  servos  zelo  flagrare.  14.  Neque  id  mirum.  Argumentum  a  maiori,  si  Satan,  qui  omnium  est  deterrimus,  adeoque  caput  et  princeps  malorum  omnium,  se  transfigurat:  quid  facient  eius  ministri?  Utrumque  nos  quotidie  experimur:  nam  Satan,  quum  nos  sollicitat  ad  malum,  non  profitetur  se  esse  id  quod  est.  Nihil  enim  proficeret,  si  admoniti  essemus  ipsum  esse  capitalem  inimicum  et  oppugnatorem  salutis  nostrae.  Semper  igitur  aliquo  integumento  abutitur  ad  nos  illaqueandos:  neque  cornua  statim  ostendit  (quemadmodum  vulgo  loquuntur),  sed  potius  dat  operam  ut  angelus  appareat.  Etiam  ubi  ad  crassa  flagitia  nos  impellit,  aliquid  tamen  coloris  praetendit,  quo  nos  incautos  attrahat  in  suas  nassas.  Quid  igitur,  ubi  sub  specie  boni,  adeoque  sub  ipso  Dei  titulo  nos  adoritur?  Eandem  (sicut  dixi)  artem  imitantur  eius  satellites.  Aureae  sunt  istae  praefationes,  vicarius  Christi,  Petri  successor,  servus  servorum  Dei:  verum  excussis  larvis,  quis  et  qualis  deprehendetur  papa?  vix  ipse  Satan  eius  magister  tam  pulchellum  discipulum  ullo  abominationis  genere  superabit.  Notum  est  illud  de  Babylone,  quod  venenum  in  calice  aureo  propinet:  ergo  cavendum  a  larvis.  Si  nunc  quispiam  roget:  Ergone  suspectos  omnes  habebimus?  Respondeo,  nequaquam  hoc  voluisse  apostolum.  Sunt  enim  notae  discretionis,  quas  negligere  stuporis  esset,  non  prudentiae.  Tantum  erigere  attentionem  nostram  voluit,  ne  leonem  protinus  a  pelle  iudicemus.  Nam  si  non  praecipitemus  iudicium,  faciet  Dominus  ut  brevi  emineant  auriculae.  Deinde  similiter  voluit  nos  admonere,  ut  in  aestimandis  Christi  servis  non  respiciamus  larvas,  sed  quaeramus  quod  est  praecipuum.  Ministros  iustitiae  hebraica  phrasi  pro  fidelibus  et  probis  dixit  15.  Quorum  finis  erit.  Hoc  addit  ad  piorum  consolationem.  Est  enim  vox  hominis  magnanimi,  qui  contemnit  stulta  hominum  iudicia:  et  patienter  exspectat  diem  Domini.  Interea  prae  se  fert  singularem  conscientiae  fiduciam  quae  Dei  iudicium  non  reformidet.  Calvini  opera.  Vol.  L.