6:128  PUER.  Omnino:  tunc  enim  unicum  perpetuumque  sacrificium,  quod  in  salutem  nostram  sufficeret,  peractum  est.  Proinde  nihil  restat  amplius,  nisi  ut  ipso  fruamur.  MINISTER.  Ergo  non  in  hunc  finem  instituta  est  coena,  ut  Deo  fiiii  sui  corpus  offeratur.  PUER.  Minime.  Solus  enim  ipse,  quum  aeternus  sit  sacerdos,  hanc  praerogativam  habet.  Atque  hoc  sonant  eius  verba,  quum  ait:  Accipite  et  manducate.  Neque  enim  ut  offeramus  corpus  suum,  sed  tantum,  ut  eo  vescamur,  illic  praecipit.  MINISTER.  Cur  duobus  utimur  signis?  PUER.  In  eo  Dominus  infirmitati  nostrae  [fol.  79]  consuluit,  quo  nos  familiarius  doceret,  se  non  cibum  modo  animis  nostris,  sed  potum  quoque  esse,  ne  alibi  quam  in  eo  solo  ullam  spiritualis  vitae  partem  quaeramus.  MINISTER.  An  utroque  uti  peraeque  omnes  absque  exceptione  debent?  PUER.  Ita  fert  Christi  mandatum:  cui  ullo  modo  derogare,  aliquid  contra  tentando,  summum  est  nefas.  MINISTER.  Solamne  eorum,  quae  dixisti,  beneficiorum  significationem  habemus  in  coena,  an  illic  re  ipsa  nobis  exhibentur?  PUER.  Quum  Dominus  noster  Christus  ipsa  sit  veritas,  minime  dubium  est,  quin  promissiones,  quas  dat  illic  nobis,  simul  etiam  impleat,  et  figuris  suam  addat  veritatem.  Quamobrem  non  dubito,  quin  sicuti  verbis  ac  signis  testatur,  ita  etiam  suae  nos  substantiae  participes  faciat,  quo  in  unam  cum  eo  vitam  coalescamus.  MINISTER.  Verum,  qui  hoc  fieri  potest,  quum  in  coelo  sit  Christi  corpus:  nos  autem  in  terra  adhuc  peregrinemur?  2)  PUER.  Hoc  mirifica  arcanaque  spiritus  sui  virtute  efficit:  cui  difficile  non  est  sociare,  quae  locorum  intervallo  alioqui  sunt  disiuncta.  MINISTER.  Ergo  nec  corpus  in  pane  inclusum  esse,  nec  sanguinem  in  calice  imaginaris?  1)  Le  53.  dimanche.  .  Double  signe  pour  nostre  infirmite.  .  La  verite  est  avec  la  figure.  .  Que  nous  recevons  Iesus  Christ  en  la  Cene,  et  comment.  .  Que  c'est  qu'il  faut  faire  pour  avoir  la  verite  du  Sacrement.  .  Arres  de  la  resurrection.  2)  Antiquiores  libri  fere  omnes  habent:  peregrinamur.  Primus  emendavit  Gallasius.