52:128  ut  alii  oremus.  Non  ergo  tantum  debent  singuli  pro  fratribus  orare,  sed  etiam  vicissim  ex  aliorum  qnoque  precibus  suppetias,  quoties  ita  res  tulerit,  sedulo  expetere.  At  puerile  est  papistarum  argumentum,  qui  inde  mortuos  implorandos  esse  colligunt,  ut  pro  nobis  orent.  Quid  enim  simile?  fratrum  precibus  se  Paulus  commendat,  quibuscum  sibi  ex  Dei  mandato  mutuam  communicationem  esse  novit.  Quis  negabit  in  mortuis  cessare  hanc  rationem?  Omissis  ergo  talibus  ineptiis,  redeamus  ad  Paulum.  Quemadmodum  insigne  modestiae  exemplum  in  eo  habemus,  quod  Paulus  alios  ad  opem  sibi  ferendam  advocat:  ita  etiam  admonemur,  rem  esse  plenam  maximae  difficultatis,  constanter  perstare  in  defensione  evangelii,  presertim  quum  urget  periculum.  Non  enim  sine  causa  ecclesias  sibi  in  hoc  adesse  cupit.  Et  simul  mirum  zeli  ardorem  considera.  Non  est  de  sua  salute  sollicitus,  non  petit  pro  se  fundi  ab  ecclesiis  preces  ut  eripiatur  ex  periculo  mortis.  Hoc  uno  contentus  est,  si  perstet  invictus  et  intrepidus  in  confessione  evangelii.  Adeo  vitam  suam  Christi  gloriae  et  evangelii  propagationi  secure  postponit.  Caeterum  per  ianuam  sermonis  simpliciter  significat  quod  ad  Ephesios  (6,  19)  dicit,  oris  apertionem:  Christus  autem  vocat  os  et  sapientiam.  Sensu  enim  nihil  differt  haec  loquutio  ab  illa,  sed  forma  tantum.  Eleganti  siquidem  metaphora  hic  expressit,  nihilo  facilius  nobis  esse,  confidenter  de  evangelio  loqui,  quam  per  clausam  et  obseratam  ianuam  irrumpere.  Est  enim  hoc  vere  divinum  opus,  quemadmodum  et  Christus  dicebat  (Matth.  10,  20),  Non  estis  vos  qui  loquimini,  sed  spiritus  patris  vestri  qui  loquitur  in  vobis.  Proposita  igitur  difficultate,  magis  Colossenses  ad  orandum  stimulat,  quum  testatur  non  aliter  se  recte  posse  loqui,  nisi  dirigatur  a  Domino  sua  lingua.  Secundo  argumentatur  a  rei  dignitate,  quum  evangelium  vocat  mysterium  Christi.  Neque  enim  perfunctorie  laborandum  est  in  re  tanta.  Tertio  commemorat  etiam  suum  periculum.  4.  Quemadmodum  oportet.  Haec  particula  difficultatem  amplificat:  nam  innuit  non  esse  rem  vulgarem.  Ad  Ephesios  addit  iva  7ca^ata  Unde  patet  eum  intrepidam  fiduciam  sibi  optasse,  qualis  Evangelii  maiestatem  decet.  Porro  quum  hic  nihil  aliud  agat  Paulus,  quam  quod  sibi  dari  cupit  gratiam  implendi  sui  officii:  meminerimus  regulam  similiter  nobis  praescribi,  ut  non  cedamus  adversariorum  furori,  sed  ad  mortem  usque  enitamur  ad  publicandum  evangelium.  Quia  autem  id  superius  est  nostris  facultatibus,  precibus  instare  convenit  ne  destituat  nos  Dominus  spiritu  fiduciae.  5.  Sapienter  ambulate  erga  extraneos,  tempus  redimentes.  6.  Sermo  vester  semper  in  gratia  sit,  sale  conditus:  ut  sciatis  quomodo  oporteat  vos  unicuique