27:128  retire  arriere  de  nous,  et  qu'il  nous  a  ainsi  laissez  a  desproveu,  d'autant  que  nous-nous  sommes  destournez  de  luy:  et  puis  que  nous  avons  reiette  sa  crainte,  et  que  nous  ne  l'avons  point  redoute  comme  il  appartenoit,  il  nous  menace  par  les  hommes,  et  nous  fait  sentir  nostre  povrete,  afin  que  nous  recourions  a  luy.  Et  au  reste,  il  a  bien  monstre  par  effect  que  sa  promesse  n'estoit  point  frustratoire.  Quelle  approbation  y  en  a-il  eu  quand  le  peuple  est  entre  en  la  terre  de  Canaan?  Car  il  y  avoit  la  une  telle  multitude  d'ennemis,  que  tous  pouvoyent  bien  estre  estonnez.  Mais  quoy?  Dieu  a  bataille  pour  son  peuple:  et  mesmes  ceste  povre  paillarde  cognoist  bien  cela,  quand  elle  parle  a  ceux  qui  estoyent  venus  espier  la  terre:  Non  (ditelle)  ie  cognoy  que  vostre  Dieu  est  le  Dieu  du  ciel  et  de  la  terre,  qui  domine  par  tout.  Et  qu'ainsi  soit,  ie  voy  que  tous  les  habitans  de  ce  pays  sont  estonnez  au  seul  renom  et  bruit  qu'on  fait  de  vous,  les  voila  tous  descouragez,  qu'il  semble  qu'ils  soyent  desia  veincus:  elle  attribue  bien  cela  a  un  miracle  de  Dieu.  Or  puis  que  ceste  povre  femme  n'ayant  qu'un  petit  goust  de  foy,  a  desia  eu  telle  apprehension:  ie  vous  prie,  ne  devons-nous  pas  contempler  beaucoup  plus  ouvertement  la  vertu  que  nostre  Seigneur  nous  promet  ici,  c'est  assavoir  qu'il  mettra  une  frayeur  et  une  crainte  devant  tous  ceux  qui  sont  plus  forts  et  plus  robustes  que  nous?  Il  est  dit  mesmes,  que  quand  Dieu  imprime  sa  marque  aux  rois  et  aux  princes,  que  les  bestes  brutes,  qui  n'ont  nulle  raison,  les  redoutent.  Et  pourquoy?  Pource  que  Dieu  besongne  d'une  facon  secrette  qui  nous  est  incognue.  Si  nostre  Seigneur  n'avoit  une  telle  vertu  pour  l'inspirer  aux  hommes,  il  est  certain  que  les  principautez  et  seigneuries  ne  pourroyent  subsister  une  seule  minute  de  temps.  Or  donc  quand  Dieu  imprime  une  telle  marque,  qu'il  effraye  non  seulement  les  hommes,  mais  les  bestes,  pour  s'assuiettir  a  ceux  ausquels  il  a  commis  le  gaive  de  iustice:  notons  que  si  nous  sommes  ses  enfans,  nous  porterons  aussi  bien  son  image:  quand  nous  serons  en  sa  sauve-garde,  que  nous  serons  contregardez  en  despit  que  nos  ennemis  en  ayent,  mesmes  nous  serons  redoutez,  et  sentirons  par  effect  comme  il  ne  tient  qu'a  nous,  que  nous  ne  soyons  aidez  de  luy:  et  mesmes  combien  que  nostre  ingratitude  repousse  la  main  de  Dieu,  si  est-ce  qu'encores  surmonte-il  par  sa  bonte  infinie.  Car  nous  voyons  bien  que  les  meschans  ayans  les  moyens  entre  mains,  toutesfois  sont  tellement  espouvantez  et  esperdus,  qu'ils  sont  la  tous  descouragez.  On  l'a  veu,  ou  nous  sommes  plus  que  stupides.  Car  nostre  Seigneur  a  besongne  d'une  telle  vertu,  qu'encores  que  nous  soyons  aveugles,  nous  y  pourrons  taster  a  la  main:  que  Dieu  a  esperdu  ceux  qui  cuidoyent  tenir  le  cous-