21:128  iuratum  redigi  nullo  modo  paterentur:  eo  tandem  deveniendum  fuit,  ut  magna  heroicoque  spiritu  praediti  Farellus  et  Calvinus  cum  Coraldo  collega  (quem  quum  ut  antea  diximus  strenue  Lutetiae  pro  veritate  depugnasset  Calvinus  Basileam  indeque  Genevam,  postquam  illic  ipse  constitisset,  perduxerat)  aperte  testarentur,  sese  coenam  Domini  tam  inter  se  discordibus,  et  ab  omni  ecclesiastica  disciplina  alienis  civibus  rite  celebrare  non  posse.  Accedebat  et  aliud  malum,  quod  videlicet  in  quibusdam  ritibus  ecclesia  Genevensis  a  Bernensi  discreparet.  Utebantur  enim  Genevenses  pane  communi,  et  baptisteria  illa  quae  vocant  tanquam  ad  baptismi  ministerium  minus  necessaria,  itemque  dies  festos  excepto  die  dominico  sustulerant.  Quibus  de  rebus  quum  synodus  Lausannae  a  Bernensibus  coacta  sic  decidisset,  ut  azymum  panem  illaque  restitui  Genevae  postularet,  collegium  autem  ministrorum  Genevensium  se  prius  audiri  aequum  duceret,  eamque  ob  causam  altera  Tigurum  synodus  esset  indicta  :  his  oblatis  occasionibus,  qui  tum  fuerant  creati  syndici  (annuus  hic  est  summusque  in  republica  Genevensi  magistratus)  factionum  ac  discordiarum  duces  populum  convocant,  eoque  rem  perducunt,  frustra  sese  Calvino  cum  eiusdem  sententiae  collegis  ad  reddendum  omnium  rationem  offerente,  ut  maiore  parte  meliorem  superante  tres  isti  fidi  Dei  servi  intra  biduum  excedere  urbe  iuberentur,  quod  coenam  Domini  celebrare  recusassent.  Hoc  decretum  quum  esset  Calvino  renunciatum  :  Certe,  inquit,  si  hominibus  servivissem,  mala  mihi  merces  persolveretur,  sed  bene  est  quod  ei  inservivi  qui  nunquam  non  servis  suis  rependit  quod  semel  promisit.  Et  quis  ista  non  existimasset  certam  perniciem  ecclesiae  Genevensi  allatura?  Eventus  tamen  contra  ostendit  divina  providentia  id  factum,  partim  ut  alibi  opera  fidelis  servi  sui  usus  variis  eum  experimentis  ad  res  maiores  instrueret,  partim  ut  seditiosis  illis  suo  ipsorum  impetu  subversis  ecclesiam  Genevensem  a  multis  sordibus  repurgaret.  Usque  adeo  sese  Dominus  in  cunctis  suis  operibus  ac  praesertim  in  ecclesiae  suae  gubernatione  admirandum  praebet.  Sed  haec  omnia  postea  res  ipsa  patefecit.  Tum  vero  magno  cum  bonorum  omnium  dolore  tres  illi  edicto  parentes  quum  Tigurum  primum  venissent  ibique  coacta  Helveticarum  ecclesiarum  aliquot  synodo,  atque  ex  synodi  decreto  per  Bernensium  intercessionem  tentatis,  sed  frustra,  Genevensium  animis  Calvinus  quidem  Basileam  inde  sese  ac  mox  Argentinam  contulit.  Illic  igitur  ex  illius  urbis  senatus  voluntate  a  summis  illis  viris,  quibus  tanquam  lucidis  gemmis  illa  tum  ecclesia  fulgebat,  Bucero,  Capitone,  Hedione,  Nigro  et  aliis  eorum  collegis  ad  theologicam  professionem  proposito  honesto  stipendio  evocatus,  non  modo  theologiam  illic  docuit  magna  cum  doctorum  omnium  applausu,