7:126  ressuscite  corporellement,  et  est  monte  au  ciel:  il  est  certain  que  les  ames  de  ses  Disciples,  pour  lesquelles  il  a  faict  cela,  s'en  iront  apres  la  mort  en  un  lieu  invisible,  qui  leur  est  definy  de  Dieu,*  et  demoureront  la,  attendant  en  patience  le  iour  de  la  resurrection.  Adonc  elles  seront  reioinctes  a  leurs  corps,  pour  venir  devant  la  face  du  Seigneur.  Car  nul  disciple  n'est  par  dessus  son  maistre.  Sainct  Chrysostome  entend  quel  bien  et  privilege  ce  nous  est,  qu'Abraham  et  sainct  Paul  sont  assis  attendans  la  perfection  de  l'eglise,  afin  de  recevoir  leur  loyer.  Car  le  pere  leur  a  predict,  qu'il  ne  leur  donnera  point  leur  salaire,  iusques  a  tant  que  nous  soyons  la  venuz,  comme  un  pere  de  famille  dira  quelque  foys  a  ses  enfans  revenans  du  labeur,  qu'ilz  attendent  a  manger,  iusques  a  tant  que  leurs  autres  freres  soyent  venus.  Tu  es  sache  que  tu  ne  recois  point  desia  ton  salaire,  que  fera  donc  Abel  qui  a  gagne  ce  pris  si  long  temps  devant  [page  159]  toy,  et  n'a  point  encore  receu  sa  couronne?  Que  fera  Noe  et  les  autres  patriarches:  car  ilz  nous  ont  attendus  iusques  icy,  et  attendront  encore  les  autres  qui  viendront  apres.  Ilz  nous  ont  prevenu  en  la  bataille,  mais  ilz  ne  nous  previendront  pas  en  la  couronne.  Car  il  y  a  un  iour  determine  pour  couronner  tous  les  enfans  de  Dieu  ensemble.  Sainct  Augustin  escrit  que  les  ames  des  Sainctz  sont  en  des  receptacles  secretz  iusques  a  ce  qu'elles  recoyvent  la  couronne  de  gloire,  au  iour  du  iugement,  au  contraire  les  ames  des  meschans,  en  attendant  leur  punition.  Et  en  une  epistre  qu'il  escrit  a  sainct  Hierome:  L'ame,  dit-il,  apres  la  mort  corporelle  aura  repos,  et  puis  apres  reprendra  son  corps  pour  avoir  gloire.  Sainct  Bernard:  La  doulceur  qu'ont  maintenant  les  ames  des  sainctz  est  grande,  mais  elle  n'est  pas  encore  parfaicte:  car  elle  se  parfera  quand  ilz  seront  assis  sur  les  thrones  comme  iuges.  Quand  elles  sont  despouilles  de  leur  corps,  elles  sont  incontinent  introduites  a  repos,  mais  non  point  a  la  gloire  du  Royaume.  Et  au  sermon  suyvant  il  poursuit  encor  ce  propos,  disant  qu'il  y  a  troys  estatz  de  l'ame.  Le  premier  au  corps,  comme  en  un  tabernacle,  le  second  apres  la  mort,  comme  au  portail  du  temple,  le  troisiesme  au  [page  160]  ciel  avec  son  corps  glorieux.  Qui  en  voudra  savoir  d'avantage,  qu'il  lise  le  second  et  le  troisiesme  sermon  du  iour  de  tous  les  sainctz.  Brief,  ceste  est  la  doctrine  perpetuelle  qui  a  tousiours  este  tenue  en  l'eglise  Chrestienne  sans  aucune  contradiction,  que  comme  nous  vivons  en  Dieu  par  foy,  durant  ceste  vie  mortelle:  aussi  apres  la  mort  nous  avons  ioye  et  consolation,  en  congnoissant  plus  clairement,  et  quasi  voyant  a  l'oeil  la  beatitude  celeste,  qu'il  nous  a  promise:  laquelle  nous  contemplons  maintenant  comme  en  un  miroir,  et  par  aenigme  (1  Cor.  13,  12).  Iamais  ceste  res-