58:126  les  noms  des  puits:  comme  nous  avons  veu  de  Berseba,  qui  estoit  le  puits  du  iurement,  d'autant  que  la  Abimelech  avoit  iure  avec  Abraham.  Or  cela  estoit  pour  maintenir  possession:  car  c'estoit  autant,  ou  plus,  qu'un  instrument  public.  Abimelech  avoit  la  passe  un  contract  avecques  Abraham:  voila  une  promesse  faite  avec  une  ceremonie  solennelle.  Abraham  lui  avoit  fait  hommage  du  puits:  le  nom  testifie  cela.  Isaac  donc  pretend  que  les  habitans  recognoissent  que  c'est  du  bien  que  son  pere  luy  a  acquis,  et  qu'il  lui  est  legitime.  Or  cela  n'y  fait  rien,  quelque  iuste  cause  qu'il  ait,  si  est-ce  qu'on  ne  laisse  pas  de  lui  intenter  querele.  Ainsi  nous  voions,  combien  que  les  enfans  de  Dieu  ne  cerchent  sinon  de  iouyr  du  bien  qui  leur  appartient  et  dont  il  leur  est  licite  d'user:  toutefois  qu'ils  en  seront  deboutez.  Car  les  contempteurs  de  Dieu  sont  impudens:  et  quoy  qu'on  leur  amene,  il  n'y  a  ne  raison  ni  equite  qui  ait  lieu  au  milieu  d'eux,  et  qu'ils  prisent.  Quand  nous  verrons  auiourd'hui  le  semblable,  ne  le  trouvons  point  trop  nouveau  ni  estrange.  Il  y  avoit  plus  de  simplicite  de  ce  tempsla,  neantmoins  nous  voions  comme  il  a  falu  qu'Isaac  fust  deboute  de  tout  ce  qu'il  pretendoit  le  plus  iustement  qu'il  est  possible.  Or  la  dessus  il  est  dit  qu'il  impose  des  noms  a  deux  puits,  desquels  on  lui  a  intente  proces:  c'est  a  dire  qu'on  l'en  a  dechasse:  car  il  n'estoit  pas  question  de  plaider,  comme  auiourd'hui:  mais  par  violence  on  Fa  dechasse.  Or  il  n'y  a  nulle  doute,  quand  il  impose  ces  noms,  Debat,  et  Noise,  ou  contention,  que  ce  ne  soit  comme  s'il  faisoit  sa  complainte  a  Dieu,  quand  il  void  que  les  aureilles  des  hommes  sont  sourdes,  et  que  toutes  raisons  sont  exclues:  il  n'a  autre  chose,  sinon  de  mettre  la  un  memorial,  afin  que  Dieu  ait  pitie  de  lui.  Or  donc  apprenons,  quand  nous  ne  gagnerons  rien  d'amener  nos  titres,  et  nos  droits,  pour  garder  ce  qui  est  nostre,  et  ce  qui  nous  aura  este  donne,  que  nous  ne  laissions  pas  toutefois  d'esperer  qu'en  la  fin  Dieu  aura  pitie  de  nous.  Voila  que  nous  avons  a  faire:  C'est,  que  tant  qu'il  nous  sera  possible  nous  mettions  peine  que  les  hommes  nous  laissent  en  paix,  et  qu'ils  ne  nous  vienent  point  gourmander,  Cela  sera  tousiours  licite  a  tous  enfans  de  Dieu:  car  combien  qu'il  nous  soit  commande  d'estre  comme  brebis  au  milieu  des  loups,  si  est-ce  que  Dieu  nous  permet  une  defense  paisible,  d'autant  qu'il  nous  a  mis  entre  ses  mains.  Il  nous  faut  donc  tascher,  entant  qu'en  nous  sera,  de  repousser  toutes  violences,  iniures,  outrages  et  excez,  qu'on  nous  veut  faire,  et  toutes  molestes  qu'on  nous  veut  intenter.  Avons  nous  fait  cela?  Si  nous  n'y  gagnons  rien,  et  que  les  hommes  soient  si  obstinez  a  mal,  et  mesmes  qu'ils  soient  possedez  d'une  telle  rage,  que  toute  raison  soit  mise  sous  le  pie  entre  eux,  recourons  a  Dieu,  et  prions  le  qu'il  lui  plaise