52:126  breviter  adiiciam  quae  praesentis  loci  expositioni  proprie  conveniunt.  Mulieribus  praecipit  ut  subiectae  sint.  Hoc  clarum  est:  sed  quod  sequitur  ambiguum,  quemadmodum  decet  in  Domino.  Quidam  enim  sic  contexunt,  subiectae  estote  in  Domino,  quemadmodum  decet.  Ego  tamen  aliter  potius,  sicut  in  Domino  decet  :  hoc  est,  secundum  Domini  institutionem:  ut  mulierum  subiectionem  Dei  autoritate  confirmet.  A  maritis  requirit  amorem,  et  ne  sint  amarulenti:  quia  periculum  est  ne  imperio  suo  abutantur  ad  tyrannidem.  20.  Filii  oboedite  parentibus.  Liberis  iniungit  ut  sine  exceptione  oboediant  suis  parentibus.  Sed  quid  si  parentes  ad  illicitum  quidpiam  adigere  eos  velint:  an  sine  discrimine  etiam  tunc  parebunt?  Atqui  plusquam  indignum  foret,  posthabito  Deo,  hominum  autoritatem  praevalere.  Respondeo,  hic  quoque  subaudiendum  esse  quod  alibi  (Ephes.  6,  1)  exprimit:  nempe  in  Domino.  Sed  quorsum  universalis  particula?  Iterum  respondeo,  ut  ostenderet,  non  iustis  tantum  imperiis  oboediendum  esse,  sed  etiam  iniquis.  Multi  enim  ita  demum  parentibus  se  praebent  morigeros,  si  grave  sibi  aut  incommodum  non  fuerit.  Atqui  hoc  unum  cogitare  debent  filii,  qualescunque  nacti  sint  parentes,  eos  tamen  sibi  contigisse  Dei  providentia,  qui  filios  parentibus  ordinatione  sua  subiicit.  Per  omnia  igitur,  ut  trihil  quantumvis  sibi  durum  aut  molestum  recusent:  per  omnia,  ut  in  rebus  mediis  personae  deferant  :  per  omnia,  ut  sibi,  inquirendo  ac  disceptando,  vel  altercando  aequum  ius  non  sumant.  Semper  tamen  usque  ad  aras.  Parentibus  immodicam  adsperitatem  prohibet,  ne  sic  absterreantur  liberi,  ut  nullius  disciplinae  liberalis  sint  capaces.  Videmus  enim  quotidianis  experimentis  quid  valeat  ingenua  educatio.  22.  Servi,  oboedite.  Quidquid  de  servis  hic  legitur,  expositione  non  indiget:  quia  iam  expositum  est  ad  Ephesios  cap.  6,  1,  praeter  haec  duo,  nam  Domino  Christo  servitis.  Item,  qui  iniuste  egerit,  mercedem  iniquitatis  recipiet.  Priore  sententia  hoc  significat,  ita  serviri  hominibus,  ut  Christus  tamen  primatum  in  dominio  obtineat,  sitque  primarius  dominus.  Eximia  sane  consolatio  omnibus  qui  in  subiectione  sunt,  dum,  quod  libenter  serviunt  dominis  suis,  obsequia  sua  perinde  Christo  grata  esse  audiunt,  ac  si  illi  praestita  essent.  Unde  etiam  colligit  Paulus,  mercedem  ab  ipso  recepturos:  sed  mercedem  haereditatis.  Quo  significat,  id  ipsum  quod  operibus  rependitur,  gratuito  dari  nobis  a  Deo.  Nam  haereditas  ex  adoptione  est.  Secundo  membro  iterum  consolatur  servos,  quod  si  premantur  iniusta  dominorum  saevitia,  Deus  ipse  ultionem  capiet,  nec  inflictas  ipsis  iniurias  ideo  negliget  quod  servi  sint:  quum  apud  eum  non  sit  personarum  respectus.  Posset  enim  haec  cogitatio  illis  animum  minuere,