51:126  croix  de  Iesus  Christ,  car  ils  auroyent  commence  par  ce  bout  que  i'ay  desia  touche,  c'est  d'estre  confus  en  nous  mesmes.  Non  sans  cause  donc  sainct  Paul  dit  que  quand  il  a  eu  sa  gloire  arrestee  en  la  croix  de  nostre  Seigneur  Iesus  Christ,  qu'il  a  quitte  le  monde  et  l'a  abandonne.  Or  par  le  monde  il  entend  tout  ce  qui  est  desirable  selon  la  chair  quand  les  hommes  ne  pensent  ni  a  Dieu,  ni  a  la  vie  celeste,  que  l'un  sera  addonne  a  l'avarice,  l'autre  a  l'ambition,  et  chacun  sera  pousse  de  son  naturel,  et  n'y  en  aura  pas  un  qui  passe  outre  ce  monde.  Quand  les  hommes  suyvront  leur  inclination,  et  que  Dieu  ne  les  aura  point  encores  touchez  de  son  sainct  Esprit  pour  les  attirer  a  soy,  il  est  certain  que  combien  qu'ils  aillent  a  travers  champs  et  qu'ils  s'esgarent,  tant  il  y  a  qu'il  y  a  grande  diversite  en  leurs  affections,  tellement  que,  quand  on  fera  examen,  l'un  aura  un  tel  but,  l'autre  tirera  tout  a  l'opposite.  Bref,  il  semble  que  les  hommes  soyent  du  tout  differens  l'un  a  l'autre:  mais  ils  se  ressemblent  tous  en  une  chose,  c'est  a  scavoir  qu'ils  se  veulent  faire  valoir  quant  au  monde,  qu'ils  sont  addonnez  a  leur  profit  particulier  ou  a  leurs  plaisirs.  Bref  ils  sont  tellement  ici  enveloppez  qu'ils  voudroyent  estre  comme  separez  d'avec  Dieu.  Or  sainct  Paul  dit  que  quand  nous  aurons  prins  toute  nostre  gloire  en  Iesus  Christ,  voire  scachans  que  par  le  moyen  de  sa  croix  il  nous  a  dedie  a  Dieu  son  Pere,  et  nous  a  acquis  le  royaume  des  cieux,  qu'alors  il  nous  sera  aise  de  nous  retirer  du  monde,  et  en  estre  comme  retranchez.  Et  pourquoy?  Quiconques  a  este  touche  au  vif  et  navre  du  sentiment  de  ses  pechez,  il  est  certain  qu'il  suyvra  la  grace  qui  luy  a  este  donnee  en  Iesus  Christ,  tellement  que  le  monde  ne  luy  sera  plus  rien.  Et  de  faict  en  cela  nous  monstrons  que  tous  les  biens  spirituels  que  Dieu  nous  a  offerts  et  ausquels  il  nous  convie,  nous  sont  comme  choses  de  neant,  d'autant  que  nous  ne  les  prisons  rien  au  pris  des  tromperies  et  allechemens  de  Satan.  Qu'est-ce  de  ce  monde,  quand  on  le  contemple  en  soy?  Il  n'y  a  celuy  qui  ne  voye  combien  nostre  vie  est  fragile:  que  ce  n'est  sinon  qu'une  fumee  qui  passe  et  qui  s'esvanouist:  tant  y  a  que  nous  voyons  les  hommes  brusler  de  leurs  affections,  et  y  sont  du  tout  transportez  et  ravis.  Dieu  crie  de  son  coste,  Poures  gens  vous  estes  plus  despourveus  de  sens  que  de  petis  enfans:  car  vous  vous  amusez  a  des  festus  et  a  des  menus  fatras  ou  ii  n'y  a  que  badinage,  vous  estes  la  attachez  du  tout,  et  cependant  quand  ie  vous  presente  ce  qui  est  la  felicite  parfaite,  vous  n'en  tenez  compte,  ce  vous  est  tout  un.  Voila  donc  qui  est  cause  que  nous  sommes  auiourd'huy  si  froids  et  si  lasches  a  recevoir  les