44:126  Hinc  colligimus  quod  nuper  attigi,  Haggaeum  et  Zachariam  fuisse  coniunctos  divinitus,  ut  alter  alterius  doctrinam  adiuvaret,  quia  negotium  erat  cum  praefracta  gente:  deinde  urgebant  etiam  durae  et  arduae  tentationes,  ut  non  vulgari  confirmatione  opus  fuerit.  Munus  ergo  suum  exorsus  est  Haggaeus  mense  sexto:  sequutus  est  Zacharias  noster  paulo  post,  nempe  mense  8.  eiusdem  anni.  Quisnam  fuerit  Darius  hic  cuius  fit  mentio,  ante  visum  fuit.  Quanquam  dissentiunt  interpretes,  tamen  certis  et  firmis  rationibus  colligitur  fuisse  hunc  filium  Hystaspis.  Sed  iterum  de  hoc  Dario  dicendum  erit  paulo  post:  et  tunc  dabitur  melior  occasio:  tantum  in  transcursu  volui  verbum  illud  dicere.  Sermo  igitur  Iehovae  tunc  datus  fuit,  vel  factus  ad  Zachariam.  Diximus  etiam  antehac  sermonem  Dei  bifariam  dirigi  ad  homines,  quia  singulos  compellat  Deus  a  minimo  usque  ad  maximum.  Sed  interea  sermonem  priore  loco  specialiter  dirigit  ad  prophetas  suos,  ubi  munus  docendi  iniungit.  Fit  ergo  sermo  Domini  ad  homines  privatos,  fit  etiam  ad  doctores,  qui  sustinent  publicam  personam,  ut  sint  postea  Dei  interpretes,  vel  internuntii.  Hoc  modo  dicit  Zacharias  sermonem  Dei  sibi  fuisse  datum,  non  ut  seorsum  audiret  quod  Deus  tunc  loquutus  est,  sed  ut  esset  fidelis  dispensator  huius  doctrinae.  Quod  ad  Zachariam  ipsum  spectat,  falluntur,  meo  iudicio,  qui  putant  filium  esse  Ioiadae,  cuius  etiam  fit  mentio  a  Christo  Mat.  23.  cap.  (v.  35).  Vocatur  quidem  illic  Zacharias  qui  occisus  fuit  inter  templum  et  altare:  vocatur  Barachiae  filius:  sed  supputatio  annorum  facile  coarguit  errorem  eorum  qui  volunt  hunc  eundem  esse  Zachariam:  quia  superior  ille,  quem  sacra  historia  vocat  Ioiadae  sacerdotis  filium,  occisus  fuit  sub  regno  Ioas.  Nunc  videndum  quam  multi  reges  successerint:  deinde,  quantum  temporis  interea  fluxerit.  Fuisset  hic  Zacharias  fere  bis  centenarius  ante  exsilium  babylonicum  si  vixisset,  etiamsi  tunc  fuisset  puer  quum  fuit  lapidatus.  Iam  h^c  Zacharias  de  quo  nunc  agitur,  functus  est  prophetae  officio  post  reditum  populi.  Ergo  non  modo