30:126  se  aliquantum  in  Dei  schola  profecisse,  quum  fatetur  se  praevaricatum  esse  sermonem  Domini,  et  verba  prophetae.  Neque  enim  Dei  sermonem  a  verbis  prophetae  tanquam  inter  se  differentia  ponit,  sed  potius  agnoscit  verba  prophetae  esse  tanquam  os  ipsum  Dei,  et  organum  sancti  spiritus,  ac  fidelem  sibi  commissi  muneris  ministrum.  Haec  itaque  doctrina  est  ex  hoc  loco  eruenda,  ut  quum  sacram  scripturam  legimus,  ibi  sciamus  Deum  suam  nobis  voluntatem  exponere;  de  qua  nos  esse  persuasos  oportet,  neque  vana  effugia  hinc  inde  quaerere.  Testimonium  enim  istud  certissimum  et  inviolabile  est,  ubi  Deus  verbo  suo  semel  autoritatem  dedit:  ut  norimus  cum  solo  illo  nobis  esse  negotium.  Atque  idem  statuendum  de  fidis  sacrosanctae  scripturae  interpretibus,  qui  sincere  officium  in  nobis  Dei  voluntatem  docendis  iaciunt:  quibus  acquiescendum  omnino  est,  neque  speranda  unquam  impunitas,  si  contemptui  ac  ludibrio  habuerimus.  Quemadmodum  multi  passim  occurrunt  nebulones  et  impii  ac  profani  homines,  qui  se  Deo  quidem  obtemperare  velle  profitentur,  sed  ubi  quaerendus,  et  quibus  signis  cognoscenda  ignorare.  Absit  a  nobis  haec  arrogantia,  immo  talis  furor  a  nobis  facessat:  quin  potius  colla  Dei  verbo  libenter  submittamus,  Deique  verbum  cum  humilitate  et  reverentia  recipiamus,  quoties  Dei  iussu  nobis  proponitur:  atque  ibi  fiduciam  omnem  nostram  esse  positam  sciamus.  Denique  ratum  istud  esto  fixumque  in  animis  nostris,  velle  Deum  signis  visibilibus  nobis  apparere,  perinde  esse  ac  si  de  coelo  detractum  vellemus.  Contentos  enim  esse  nos  ipsius  verbo  oportet,  cui  satis  dedit  fidei  et  autoritatis.  Quare  nulla  alia  criminatione  opus  est  ad  nos  condemnandos,  quum  a  via  Dei  verbo  monstrata  recesserimus.  Quemadmodum  et  ipsum  Dominum  nostrum  Iesum  Christum  hoc  argumento  videmus  adversus  eos  uti  qui  sermoni  ipsius  contradicebant:  Non  condemnabo  vos,  inquit,  ultimo  die,  verbum  istud  cui  iam  reluctamini  et  quod  obstinate  reiicitis  vos  condemnabit.  Quare  sciamus  Dei  verbum  sufficiens  esse  ad  nos  condemnandos,  si  non  illud  auscultaverimus,  et  qua  decet  humilitate  et  reverentia  receperimus.  Contra  vero  persuasos  esse  oportet,  nos  a  Deo  recipiendos  et  in  suorum  numerum  admittendos  et  tanquam  iustos  habendos  quum  mandata  ipsius  sequuti  fuerimus,  licet  nos  mundus  cane  peius  et  angue  exosos  persequatur.  Porro  quum  Saul  hic  populi  metum  adfert,  quo  adductum  se  ipsius  voci  auscultasse  ait,  peccatum  suum  conatur  quidem  elevare  et  minuere:  sed  magis  auget,  quod  obedientia  illa  plena  sit  rebellionis,  quum  ab  hominibus  transfiguramur,  et  a  Deo  abducimur,  ne  suum  ius  in  nos  retineat.  Denique  humilitas  illa,  qua  servimus  hominibus,  et  rebus  creatis  mortalibus,  Deo  et  ipsius  verbo  detrahit  et