50:125  125  CAPUT  XI.  126  miam  Corinthiorum  perstringit  in  recipiendis  pseudoapostolis.  Nam  quum  erga  ipsum  Paulum  nimium  morosi  essent  ac  irritabiles,  ut  levissima  quavis  occasione  offenderentur,  si  vel  modice  illos  reprehenderet:  pseudoapostolis  nihil  non  permittebant,  eorum  supercilium,  fastum,  importunitatem  libenter  patiebantur:  eiusmodi  praeposteram  reverentiam  damnat,  quod  delectu  interim  et  iudicio  carerent.  Ac  si  diceret:  qui  fit  ut  isti  tantum  sibi  licentiae  in  vos  usurpent,  vos  autem  aequo  animo  feratis  eorum  dominium?  Si  alium  Christum  vobis  attulissent,  aut  aliud  evangelium,  aut  alium  spiritum  quam  per  manum  meam  receperitis:  probarem  sane  vestram  erga  illos  observantiam:  nam  essent  digni  tanto  honore.  Sed  quum  nihil  vobis  contulerint  quod  ego  non  prius  vobis  dedissem:  quae  ista  est  gratitudo,  tantum  non  adorare  eos  quibus  nihil  debetis:  me  vero  contemnere,  per  quem  largitus  vobis  est  Deus  tot  ac  tam  praeclara  beneficia?  Talis  hodie  quoque  est  reverentia  papistarum  erga  suos  pseudoepiscopos:  nam  quum  durissima  premantur  eorum  tyrannide,  non  difficulter  eam  sustinent:  Christum  vero  ipsum  susque  deque  habere  non  dubitant.  Alius  Christus,  et  aliud  evangelium  aliter  hic  capitur,  atque  ad  Galatas  capite  1,  8.  Nam  alius  illic  vero  et  germano  opponitur:  ideoque  mendax  et  fictitium  significat.  Hic  autem  vult  dicere,  si  illorum  ministerio,  non  meo,  evangelium  ad  vos  pervenisset.  5.  Arbitror  enim  me.  Nunc  tollendo  quod  unum  valere  ad  eorum  excusationem  poterat,  ingratitudinis  eos  convincit.  Aequalem  enim  se  etiam  summis  apostolis  fuisse  admonet.  Ingrati  igitur  Corinthii,  qui,  quum  talem  experti  essent,  non  pluris  faciebant:  autoritatem  vero  illi  iure  debitam  transferebant  ad  homines  nullius  pretii.  Modestiae  tamen  causa  dicit  se  ita  existimare  :  quum  res  esset  omnibus  cognita  et  manifesta.  Intelligit  autem  quod  suum  apostolatum  ornasset  Deus  non  minoribus  gratiis  quam  Iohannis  aut  Petri.  Porro  qui  Dei  dona  a  se  agnita  contemnit,  causam  dicere  non  potest  quin  malignus  et  ingratus  iudicetur.  Ergo  ubicunque  conspicies  Dei  dona,  illic  Deum  ipsum  reverearis  oportet.  Intelligo  unumquemque  eatenus  honore  dignum,  prout  Dei  gratiis  excellit:  praesertim  vero  si  quis  inde  fructus  ad  te  redundaverit.  6.  Caeterum  licet  imperitus.  Unum  erat  in  quo  censeri  prima  specie  poterat  inferior:  quia  facundia  destitueretur.  Ergo  hoc  iudicium  praeoccupando  corrigit,  dum  se  rudem  quidem  sermone  et  impolitum  esse  fatetur:  scientiam  tamen  sibi  vendicat.  Sermonem  hic  vocat  dictionis  splendorem.  Ac  per  scientiam  intelligit  ipsam  doctrinae  substantiam.  Quemadmodum  enim  in  homine  est  anima  et  corpus:  ita  etiam  in  doctrina  est  res  ipsa  quae  traditur,  et  verborum  ornatus  quo  vestitur.  Paulus