44:125  ZACHARIAS.  Sequuntur  prophetiae  Zachariae,  qui  adiutor  et  collega  fuit  tam  Haggaei  quam  Malachiae,  ut  paulo  post  satis  liquebit.  Tres  igitur  illos  eodem  fere  tempore  misit  Deus,  ut  quisque  aliis  subscriberet,  atque  ita  uno  consensu  et  ore  confirmarent  quod  Deus  illis  mandaverat.  Fuit  autem  operae  pretium  plures  simul  loqui,  ut  maior  esset  autoritas  vaticiniis,  quia  luctandum  erat  populo  cum  variis  et  gravissimis  tentationibus.  Iam  Satan  illis  multa  certamina  excitaverat:  sed  maiora  adhuc  instabant.  Ergo  oportuit  pluribus  testimoniis  eos  animari  ne  deficerent.  Porro  quod  ad  prophetam  nostrum  spectat,  partim  Iudaeis  reducit  in  memoriam  cur  Deus  tam  severe  egisset  cum  ipsorum  patribus:  partim  eos  ad  bonam  spem  hortatur,  modo  ex  animo  resipiscant,  et  animos  erigant  ad  spem  verae  et  solidae  liberationis.  Interea  illos  duriter  castigat,  quia  opus  erat  tali  purgatione  quum  adhuc  residerent  in  suis  sordibus.  Etsi  enim  memoria  exsilii  debebat  illis  fraenum  iniicere,  ut  sollicite  et  cum  timore  se  Deo  subiicerent:  tamen  iam  alibi  visum  est,  et  patebit  etiam  melius  ex  progressu,  quasi  nullam  scelerum  suorum  poenam  sensissent,  ita  fuisse  securos,  ut  nullus  vigeret  apud  ipsos  timor  Dei,  et  nulla  fere  esset  religio.  Oportuit  igitur  misceri  duras  et  rigidas  obiurgationes  promissionibus  gratiae,  ut  hoc  modo  parati  essent  ad  recipiendum  Christum.  Haec  igitur  summa  est.  Nunc  venio  ad  verba.  CAPUT  1.  1.  Mense  octavo  anno  secundo  Darii,  fuit  sermo  Iehovae  ad  Zachariam  filium  Barachiae  filii  Addo  (Iddo,  ad  verbum)  prophetae  (vel  prophetam)  dicendo,  2.  Iratus  est  Iehova  erga  patres  vestros  ira.  3.  Dices  igitur  ad  eos.  Sic  dicit  Iehova  exercituum,  Revertimini  ad  me,  dicit  Iehova  exercituum:  et  revertar  ad  vos,  dicit  Iehova  exercituum.