7:124  ilz  ne  sont  pas  encore  du  tout  prisonniers  de  Dieu:  mais  sont  comme  Tagabondz,  fuyans  la  presence  du  iuge.  Apres  la  mort,  il  n'est  pas  ainsi.  Car  Dieu  les  tient  comme  enchesnez,  en  sorte  qu'ilz  voyent  bien  quelle  punition  leur  est  apprestee,  laquelle  il  n'y  a  moyen  d'eviter.  Ilz  sont  donc  en  angoisse  extreme,  attendant  l'execution  de  leur  sentence.  De  pouvoir  determiner  le  lieu  ou  ilz  sont,  ce  n'est  pas  a  nous,  et  ne  nous  en  doit  challoir.  Et  d'autrepart,  il  ne  nous  faut  pas  imaginer,  que  les  ames  soyent  semblables  aux  corps,  pour  tenir  certain  espace  de  lieu.  Contentons  nous  de  savoir  qu'elles  sont  en  enfer,  comme  il  est  dict  du  mauvais  Riche  (Luc  16,  23):  c'est  a  dire,  en  un  torment,  et  comme  en  une  gehenne,  d'autant  qu'elles  se  sentent  reiectees  de  Dieu,  et  attendent  encore  une  plus  grande  revelation  de  son  ire.  De  la  il  est  facile  de  conclurre  quel  est  l'estat  des  ames  fideles.  Cependant  que  nous  sommes  en  ce  monde,  il  est  vray  que  noz  consciences  ont  ioye  et  repos  en  Dieu:  mais  d'autant  qu'elles  sont  agitees  continuellement  de  diverses  tentations,  ce  repos  la  est  inquiete  de  beaucop  de  sollicitudes.  D'avantage,  d'autant  que  nostre  salut  consiste  en  esperance,  il  nous  est  cache,  tellement  que  [page  15  5]  nous  ne  cheminons  point  en  visions,  comme  dit  sainct  Paul  (2  Cor.  5,  7)  :  mais  quand  ce  vient  apres  la  mort,  d'autant  que  toute  bataille  est  cessee,  et  que  noz  ennemis  ne  nous  peuvent  plus  faire  d'assaux,  nous  sommes  comme  en  lieu  de  plus  grande  seurete.  D'avantage,  nous  n'espererons  plus  alors,  ainsi  que  nous  faisons  maintenant:  c'est  a  dire  par  dessus  et  contre  esperance:  mais  nous  attendons  la  felicite,  laquelle  nous  sentons  et  voyons  en  partie.  Selon  ceste  raison,  que  l'ame  de  Lazare  recoit  ioye  et  consolation,  il  est  certain  qu'au  milieu  des  miseres  de  ce  monde,  il  s'estoit  console  tousiours  en  Dieu  sa  vie  durant.  Mais  nostre  Seigneur  specifie  une  ioye  qu'a  l'ame  fidele  apres  la  mort,  se  voyant  delivree  de  toute  fragilite,  de  defiance,  de  toutes  mauvaises  concupiscences,  et  de  tous  les  dangiers  des  tentations  qui  nous  adviennent  iournellement.  Item,  ayant  plus  claire  et  certaine  congnoissance  de  sa  beatitude  et  gloire  immortelle.  Ainsi  quand  nous  voudrons  en  un  mot  exprimer  la  condition  des  ames  fideles  apres  la  mort,  nous  pourrons  dire  qu'elles  sont  en  repos,  non  pas  qu'elles  soyent  en  parfaicte  beatitude  ou  gloire,  mais  entant  qu'elles  se  contentent  de  la  ioye  et  consolation  que  Dieu  leur  donne,  en  attendant  le  iour  de  la  redemption  derniere.  [page  156]  Si  quelcun  veut  que  cela  luy  soit  declaire  par  similitude,  le  temps  auquel  nous  habitons  en  ce  corps  mortel,  est  comme  le  temps  de  guerre:  quand  nous  sommes  despouillez  de  nostre  chair,  la  bataille  cesse  et  prend  fin,  et  avons  la  vic-