58:124  Qu'Isaac  s'en  est  venu  en  la  volee  de  Gerar.  Il  ne  sortoit  pas  du  tout  du  pais:  mais  il  s'escartoit,  afin  de  n'estre  plus  en  veue,  et  d'oster  tout  obiect  de  malice  a  tous  les  habitans  de  Gerar:  car  nous  savons  quels  ont  este  Ies  Philistins.  Ici  nous  voions  en  premier  lieu  la  patience  d'Isaac:  lequel  non  seulement  n'a  point  replique:  mais  pour  acquerir  paix  et  repos,  a  trousse  son  bagage,  et  se  en  est  alle  dresser  son  pavillon  ailleurs,  et  a  monstre  en  cela  son  humilite.  Il  est  vray  qu'il  ne  s'est  pas  du  tout  retire  du  pais:  mais  si  est-ce  neantmoins  qu'il  pouvoit  faire  quelque  resistence,  pour  demeurer  au  lieu  ou  il  estoit  comme  habitue.  Nous  avons  veu  que  son  pere  Abraham  avoit  dresse  comme  une  petite  armee  en  sa  maison:  lui  donc  pouvoit  faire  le  semblable,  et  pouvoit  repousser  l'iniure  qu'on  lui  faisoit.  Or  tant  y  a  qu'il  est  comme  un  agneau  :  et  Moise  ne  dit  pas  qu'il  ait  esmeu  grande  contention,  qu'il  se  soit  escarmouche  combien  qu'on  le  chasse,  voire  a  tort,  apres  l'avoir  receu,  et  apres  lui  avoir  monstre  quelque  signe  d'humanite:  mais  il  quitte  le  tout.  Ainsi  donc,  nous  sommes  enseignez,  quand  on  nous  opprimera,  de  porter  patiemment  les  iniures,  et  ne  point  prendre  l'espee  pour  nous  venger,  quand  il  nous  semblera  que  nous  avons  iuste  cause  devant  les  hommes  Car  nous  savons  ce  qui  nous  est  commande,  De  donner  lieu  a  l'ire:  c'est  de  souffrir  que  Dieu  nous  revenge.  Et  ainsi  ensuivons  nostre  pere  Isaac,  en  ce  qu'il  a  souffert  d'estre  chasse  meschamment  du  pais,  ou  il  s'estoit  porte  en  telle  sorte,  qu'il  devoit  estre  aimable  a  tous:  car  quelle  occasion  de  supsonner  mal  en  lui  y  avoit-il?  Et  cependant  on  le  chasse  et  dit-on  qu'il  est  plus  fort,  comme  s'il  avoit  abuse  de  sa  grandeur.  Voila  donc  pour  un  item,  quant  a  ceste  retraite  d'Isaac,  ou  il  est  dit,  Qu'il  est  venu  en  la  valee  de  Gerar.  Or  Moise  aiouste  une  autre  tentation  qui  lui  a  este  bien  dure  :  C'est,  qu'il  a  cave  les  puits  que  son  pere  Abraham  avoit  cavez  durant  sa  vie:  et  qu'il  a  retenu  les  noms  qui  leur  estoient  imposez.  Yci  nous  voions  en  premier  lieu  la  malice  des  Philisthins:  combien  qu'Abraham  eust  converse  avec  eux  si  humainement  que  rien  plus:  et  mesme  qu'Abimelech  le  predecesseur  de  cestui-ci,  eust  fait  alliance  avec  lui,  et  qu'il  le  fust  venu  cercher,  qu'Abraham  lui  eust  fait  hommage  d'un  puits  qu'il  avoit  cave,  et  qu'il  l'eust  rachete,  et  qu'il  lui  en  eust  presente  l'hommage,  comme  nous  avons  veu:  toutefois  si  est-ce  qu'ils  viennent  estoupper  les  puits.  Us  avoient  cogneu  qu'Abraham  estoit  serviteur  de  Dieu,  et  Prophete  :  Dieu  avoit  maintenu  sa  querele,  et  il  en  avoit  eu  un  tesmoignage  visible:  car  la  maison  d'Abimelech  mesme  avoit  este  batue,  que  Dieu  avoit  la  mis  son  fleau:  ils  devoient  donc  bien  par  cela  estre  induits  a  le  souffrir  :  et  encore  qu'ils  eussent  este  mal  avisez