52:124  Christo,  ut  inter  nos  vivamus  unanimes.  Et  addit,  in  uno  corpore:  quo  significat,  non  aliter  nobis  cum  Deo  convenire,  nisi  inter  nos  cohaereamus,  tanquam  unius  corporis  membra.  Quum  iubet  gratos  esse,  non  tam  ad  memoriam  beneficiorum  id  refero,  quam  ad  morum  suavitatem.  Ideo  ut  tollatur  ambiguitas,  malo,  sitis  amabiles:  quamguam  fateor  si  gratitudo  sensus  nostros  occupet,  fieri  non  posse  quin  ad  fovendum  inter  nos  mutuum  amorem  propensi  simus.  16.  Sermo  Christi  inhabitet  Vult  doctrinam  evangelii  illis  esse  familiarem.  Unde  licet  colligere  quo  spiritu  hodie  agantur  qui  atrociter  illam  populo  christiano  interdicunt,  ac  tumultuose  clamitant,  nullam  pestem  magis  cavendam  esse  quam  scripturae  lectionem  plebi  vulgari.  Nam  certe  Paulus  hic  ordinum  omnium  viros  ac  mulieres  alloquitur.  Nec  tantum  vult  eos  tenuem  duntaxat  gustum  capere  sermonis  Christi,  sed  iubet  ut  in  ipsis  habitet:  hoc  est,  fixam  sedem  habeat,  idque  largiter,  quo  magis  in  dies  proficere  studeant,  ac  crescere.  Verum  quia  in  multis  praeposterum  est  discendi  studium,  dum  .ad  ambitionem  suam  abutuntur  verbo  Domini,  vel  ad  inanem  curiositatem,  vel  ipsum  quovis  modo  adulterant:  ideo  adiungit,  in  omni  sapientia.  Ut  inde  scilicet  edocti  sapiamus  quod  oportet.  Porro  sapientiam  hanc  breviter  definit,  ut  se  ipsos  doceant  Colossenses.  Doctrina  hic  pro  utili  eruditione  capitur,  quae  ad  aedificationem  valet,  sicuti  ad  Eomanos  capite  12,  7,  qui  docet,  in  doctrina.  Item  ad  Timotheum  :  Omnis  scriptura  ad  docendum  est  utilis  (2.  Tim.  3,  16).  Hic  verus  est  usus  sermonis  Christi.  Iam  vero  quia  interdum  per  se  doctrina  friget:  ac  (quemadmodum  ille  inquit)  dum  simpliciter  ostenditur  quid  rectum  sit,  virtus  laudatur  et  alget:  simul  addit  admonitionem,  quae  est  veluti  doctrinae  confirmatio  et  stimulus.  Neque  intelligit  singulis  tantum  prodesse  debere  Christi  sermonem,  ut  se  ipsos  doceant,  sed  mutuam  doctrinam  et  admonitionem  exigit.  Psalmis,  hymnis.  Non  restringit  Christi  sermonem  ad  has  species,  sed  magis  significat  usque  adeo  ad  aedificationem  debere  esse  compositos  omnes  nostros  sermones,  ut  etiam  qui  hilaritati  serviunt,  nihil  sapiant  vanum.  Ac  si  diceret:  Incredulis  ineptam  hanc  oblectationem  relinquite,  quam  ex  ludicris  et  nugatoriis  iocis  ac  facetiis  capiunt.  Vestri  autem  sermones  non  severi  modo,  sed  etiam  laeti  et  hilares,  utilitatem  aliquam  contineant.  Pro  obscoenis  illorum  cantilenis,  aut  saltem  parum  modestis  et  gravibus,  decent  vos  hymni  et  cantica,  quae  resonent  laudem  Dei.  Porro  sub  his  tribus  nominibus  complexus  est  omne  genus  canticorum.  Quae  ita  vulgo  distinguunt,  ut  Psalmus  sit  in  quo  concinendo  adhibetur  musicum  aliquod  instrumentum  praeter  linguam.  Hymnus  proprie  sit  laudis