51:124  est  nostre  iustice,  qu'il  est  nostre  sagesse,  qu'il  est  nostre  vertu:  bref,  qu'il  a  toute  perfection  de  vie,  de  ioye  et  de  felicite  en  soy:  ce  n'est  pas  assez,  car  il  y  a  trop  longue  distance  entre  luy  et  nous,  et  pourtant  il  nous  faut  scavoir  comment  et  par  quel  moyen  nous  pourrons  estre  participans  de  toutes  les  graces  que  nous  devons  cercher  en  Dieu.  Or  nous  scavons  que  le  tout  nous  est  communique  en  Iesus  Christ:  voire  d'autant  qu'il  est  descendu  ici  bas,  qu'il  s'est  aneanti,  qu'il  a  voulu  estre  crucifie  pour  nous.  Puis  qu'ainsi  est  donc  qu'il  nous  faut  puiser  de  nostre  Seigneur  Iesus  Christ  tout  ce  qui  nous  defaut,  maintenant  nous  voyons  pourquoy  sainct  Paul  dit  qu'il  ne  cerchera  nulle  gloire  sinon  en  la  croix  de  nostre  Seigneur  Iesus  Christ.  Et  pourquoy?  Car  d'autant  qu'il  a  souffert  la  mort  tant  dure  et  amere,  mesmes  qu'il  s'est  expose  au  iugement  de  Dieu  pour  nous,  et  qu'il  a  receu  toute  nostre  malediction,  voila  comme  il  nous  a  este  donne  pour  sagesse,  pour  iustice,  pour  sainctete,  pour  vertu,  et  tout  ce  qu'il  nous  faut.  Or  en  premier  lieu,  il  nous  faut  apprendre  qui  nous  sommes,  pour  bien  abattre  toute  gloire  et  pour  nous  arrester  a  nostre  Seigneur  Iesus  Christ.  Car  nous  en  voyons  beaucoup  qui  crevent  d'orgueil  et  ne  scavent  pourquoy.  Il  n'y  a  que  vent  et  fumee  en  tout  ce  qu'ils  imaginent  d'eux-mesmes.  Mais  cependant  si  est-ce  que  par  faute  d'avoir  bien  examine  quels  ils  sont,  ils  ne  cerchent  point  Iesus  Christ  et  tels  sont  les  hypocrites  et  ceux  qui  se  contrefont  et  sont  enflez  de  presomption  de  leur  merites.  Il  faut  donc,  (comme  i'ay  desia  touche)  que  nous  regardions  a  nostre  condition,  et  voir  combien  elle  est  miserable  iusques  a  ce  que  nostre  Seigneur  Iesus  ait  eu  pitie  de  nous.  Voila  comme  nous  serons  preparez  de  venir  a  luy.  C'est  pour  un  item.  Mais  ce  n'est  pas  encores  le  tout.  Car  il  y  en  a  qui  pourront  confesser  qu'ils  sont  pecheurs,  et  qu'il  n'y  a  en  eux  que  toute  vanite,  et  cependant  neantmoins  cropissent  en  leur  ordure.  Et  pourquoy?  Car  ils  n'apprehendent  pas  le  iugement  de  Dieu:  mais  sont  comme  eslourdis  en  ce  monde.  Tous  ces  gaudisseurs  qui  s'abandonnent  a  yvrongnerie,  ou  a  paillardise,  ou  a  choses  semblables,  ils  ne  pourroyent  pas  excuser  leur  vilenie,  et  mesmes  il  faut  qu'ils  en  ayent  honte:  et  tant  y  a  neantmoins  qu'ils  s'y  plaisent,  et  persistent  la  comme  endurcis.  Et  pourquoy?  D'autant  qu'ils  sont  enivrez  en  ce  monde,  et  le  diable  leur  a  bande  les  yeux  tellement  qu'ils  ne  voyent  pas  qu'il  faudra  une  fois  veoir  a  conte.  Ils  sont  comme  stupides,  et  se  font  accroire  qu'ils  demoureront  tousiours  en