27:124  nous  pour  nous  maintenir?  Or  il  nous  faut  regarder  a  nostre  Dieu.  Desia  nous  avons  dit  que  ce  n'est  point  sans  cause  qu'il  s'attribue  ce  tiltre,  qu'il  est  le  Dieu  des  armees:  c'est  pour  nous  monstrer  que  nous  serons  deffendus  de  luy,  en  telle  sorte  que  nos  ennemis  seront  rembarrez:  combien  qu'ils  s'eslevent  avec  une  violence  impetueuse  tant  et  plus,  et  que  nous  soyons  estonnez  aux  premiers  alarmes:  si  est-ce  que  nous  surmonterons  tousiours,  estans  ainsi  assistez  de  celuy  qui  a  toute  vertu  en  sa  main.  Et  de  faict,  nous  savons  que  Dieu  a  ses  anges,  lesquels  il  a  ordonnez  pour  nostre  salut.  Ii  ne  se  contente  point  d'avoir  son  bras  estendu  pour  nous  maintenir:  mais  il  a  desploye  toutes  ses  benedictions  pour  nous  en  munir  de  tous  costez.  Confions-nous  donc  en  cela,  et  cheminons  hardiment  parmi  tous  les  troubles  qui  nous  sont  apprestez,  ne  doutant  point  que  nous  ne  les  surmontions,  ayans  un  tel  conducteur,  comme  il  nous  est  declaire  en  ce  passage.  Et  puis,  que  nous  appliquions  cela  mesmes  aux  necessitez  de  la  vie  presente.  Il  est  vray  que  le  principal  est,  que  Dieu  nous  secoure,  afin  que  nous  achevions  le  cours  de  la  vie  presente:  mais  cependant  si  faut-il  qu'un  chacun  soit  aide  de  luy  a  chacune  heure,  qu'il  nous  conduise  par  tant  de  mauvais  passages  qu'il  nous  faut  passer,  et  qu'il  nous  preserve  de  tous  dangers.  Il  faut  donc  que  nous  ayons  ceci  tout  conclu,  que  non  seulement  Dieu  nous  donnera  une  victoire  finale  pour  nous  amener  en  son  royaume  des  cieux:  mais  qu'en  ce  monde  tousiours  il  nous  aidera,  que  nous  sortirons  de  toutes  les  fascheries  et  perplexitez  ou  nous  serons  entrez  :  que  mesmes  quand  il  semblera  que  nous  soyons  du  tout  abysmez,  il  ne  faudra  sinon  qu'il  nous  tende  la  main,  et  nous  voila  au  dessus.  Et  au  reste  que  nous  sachions,  quand  Dieu  nous  a  promis  une  telle  victoire  contre  Satan,  et  nos  ennemis  spirituels,  qu'aussi  quand  les  hommes  se  dresseront  contre  nous,  qu'ils  ne  pourront  rien:  voire  quand  nous  aurions  tout  le  monde  contraire,  et  ennemi,  il  nous  doit  bien  suffire  que  Dieu  nous  soit  favorable.  Car  puis  qu'il  nous  a  promis  que  toutes  les  machinations  qu'ils  attenteront,  ne  seront  rien,  et  qu'il  les  renversera,  nous  pourrons  bien  estre  en  repos,  attendans  tousiours  en  patience,  encores  que  pour  un  temps  nous  soyons  confus,  et  que  nous  n'appercevions  pas  que  Dieu  vueille  besongner,  selon  qu'il  l'a  declaire,  toutesfois  que  nous  demeurions  fermes  en  sa  doctrine,  iusques  a  tant  qu'il  nous  monstre  l'effect  de  sa  verite.  Voila  comme  nous  pourrons  despitter,  et  desfier  tous  les  meschans  qui  ne  demandent  sinon  de  nous  ruiner.  Ils  seront  comme  chiens  enragez,  et  quand  ils  ne  pourront  mordre,  ils  abbayeront,  ils  auront  tousiours  la  gueule  ouverte,  ils  auront