21:124  suum  adversus  sacram  triadem  virus  dispergens:  quem  sese  nihil  magis  appetere  quam  eius  colloquium  simulantem  condicto  loco  et  tempore  Calvinus,  (idque  non  citra  magnum  vitae  periculum,  quod  tum  latere  propter  accensam  adversariorum  rabiem  cogeretur),  diutius  quidem  sed  frustra  exspectavit,  illo  ne  Calvini  quidem  conspectum  ferente.  Fuit  autem  is  annus  XXXIV  supra  sesquimillesimum  horrenda  in  multos  pios  saevitia  insignis,  Gerardo  Ruffo,  Sorbonico  Magistro,  sed  pietatis  studia  magnopere  tunc  adiuvante,  itemque  Coraldo  Augustiniani  ordinis  (qui  unum  et  alterum  iam  annum  favore  Navarrenae  adiuti  negotium  Christi  in  urbe  plurimum  promoverant)  non  modo  ex  pulpito  deturbatis,  sed  etiam  in  carcerem  coniectis:  et  eousque  inflammata  fascinati  Francisci  Regis  ira  ob  schedas  quasdam  adversus  missam  per  urbem  sparsas  ipsiusque  regii  cubiculi  foribus  adfixas,  ut  publica  decreta  supplicatione,  cui  una  cum  liberis  suis  tribus  nudo  capite  ardentem  facem  quasi  expiationis  causa  gestans  interfuit,  quatuor  urbis  celebrioribus  locis  octonos  martyres  vivos  ustulari  iuberet,  atque  adeo  solenni  iurerando  testaretur,  se  ne  liberis  quidem  suis  parsurum,  si  forte  teterrimis  illis,  ut  vocabat,  haeresibus  essent  infecti.  Eiusmodi  rerum  statum  intuens  Calvinus,  paulo  postquam  Aureliae  insignem  illum  libellum  edidisset  quem  Psychopannychian  inscripsit,  adversus  illorum  errorem  qui  dormire  seiunctas  a  corporibus  animas  errore  a  vetustissimis  usque  saeculis  repetito  docebant,  secedere  ex  Gallia  statuit,  eoque  consilio  una  cum  illo,  quicum  eum  apud  Santonas  aliquamdiu  vixisse  diximus,  iter  Basileam  versus  per  Lotharingiam  ingressus,  non  procul  urbe  Metensi  in  maximam  difficultatem  incidit,  alterius  ex  servis  perfidia  pecunia  utrique  subrepta,  qui  altero  ex  equis  validiore  strato  tam  repente  se  in  fugam  dedit,  ut  deprehendi  nullo  pacto  potuerit,  herisque  ipsis  ab  omni  viatico  relictis  imparatissimis,  adeo  ut  ab  altero  demum  servulo  decem  mutuo  sumptis  coronatis  vix  Argentinam,  indeque  Basileam  pervenerint.  Ibi  praecipuos  habuit  amicos  summos  illos  homines  Simonem  Grynaeum  et  Wolfgangum  Capitonem,  seseque  Hebraicis  literis  dedit:  et  quamvis  latere  modis  omnibus  studeret,  id  quod  ex  epistola  quadam  Buceri  ad  eum  altero  post  anno  data  liquet,  tamen  edere  coactus  est  Christianae  religionis  Institutionem,  quam  vocavit,  operis  longe  maximi  rudimentum.  Quum  enim  illam  Francisci  Regis  carnificinam  aegre  ferrent  Germani  principes,  qui  evangelio  nomen  dederant,  et  quorum  ille  tum  amicitiam  ambiebat,  hoc  unum  ille  ooyov  tpaq^axov  autore  Guilielmo  Bellaio  Langaeo  repererat,  ut  sese  nonnisi  in  Anabaptistas,  pro  verbo  divino  suum  tantum  spiritum  iactantes,  et  omnium  magistratuum