7:122  Baptesme  nous  sommes  entez  en  son  corps,  pour  estre  vrayement  ses  membres,  et  sentir  en  nous  tel  effect  de  sa  vertu,  que  les  branches  d'un  arbre  font  de  la  racine.  Car  nous  sommes  uniz  avec  luy,  iusques  a  estre  faictz  une  mesme  substance.  Et  ne  faut  point  alleguer  autre  raison,  que  ce  qu'il  en  a  prononce  de  sa  bouche.  D'autant  que  ie  vis,  dit-il,  vous  vivrez  (Iehan  14,  19).  Or  nous  savons  que  la  vie  de  Iesus  Christ  n'est  point  temporelle,  ne  [page  150]  par  intervalle.  Si  donc  nous  vivons  d'autant  qu'il  vit,  il  s'ensuit  que  c'est  sans  fin.  Car  il  faudroit  qu'il  mourust  avec  nous.  Et  c'est  ce  qu'il  avoit  dict  au  paravant:  Qui  mange  ma  chair  et  boit  mon  sang,  il  demeure  en  moy,  et  moy  en  luy  (Iehan  6,  56).  Si  Iesus  Christ  demeure  en  nous,  il  s'ensuit  que  la  vie  quant  et  quant  y  reside:  suyvant  ce  qu'il  avoit  dict  au  paravant:  Comme  le  Pere  a  la  vie  en  soymesme,  aussi  il  a  donne  cela  au  Filz  d'avoir  cela  en  soymesme  (Iehan  5,  26).  Il  est  bien  aise  de  voir,  que  iamais  les  Anabaptistes  n'ont  gouste  comme  nous  sommes  conioinctz  avec  nostre  Seigneur  Iesus.  Car  ce  seul  principe  est  suffisant  pour  renverser  leur  faulse  opinion  et  pernicieuse,  touchant  ceste  dormition  phantastique,  qu'ilz  attribuent  aux  ames.  Car  nous  voyons  au  contraire  la  deduction  qu'en  faict  sainct  Paul,  quand  il  dit  que  desia  nous  sommes  bourgeois  du  ciel,  estans  assiz  es  lieux  celestes  avec  nostre  Seigneur  Iesus  (Ephes.  2,  6.  19;  Phil.  3,  20).  Tenons  nous  donc  a  ce  que  dict  sainct  Paul,  que  nous  sommes  mortz  quant  au  monde  et  que  nostre  vie  est  cachee  avec  Christ  en  Dieu  (Col.  3,  3).  Or  par  cela  il  signifie  ce  qu'il  dit  ailleurs:  Ie  ne  vis  plus,  mais  Christ  vit  en  moy  (Gal.  2,  20).  Tenons,  dy-ie,  ceste  resolution,  qu'ayans  une  conionction  inseparable  avec  nostre  Seigneur  Iesus,  [page  151]  nous  sommes  participans  de  la  vie  qui  est  permanente  en  luy.  Et  qu'il  nous  souvienne  que  luy  estant  ressuscite,  ne  meurt  plus,  et  que  la  mort  ne  dominera  point  sur  luy  (Rom.  6,  9),  non  seulement  quant  a  sa  personne,  mais  aussi  quant  a  ses  membres.  Il  est  vray  qu'il  y  a  ceste  difference,  qu'en  lny  olie  est  pleinement  vaincue,  et  du  tout,  en  nous  seulement  en  partie.  Tant  y  a  neantmoins  que  mesme  en  nous  elle  est  tellement  vaincue,  que  iamais  elle  n'y  pourra  exercer  son  regne.  Et  ainsi  en  attendant  l'accomplissement  de  nostre  redemption,  ne  doutons  que  le  commencement,  qui  en  est  en  noz  ames,  n'y  demeure  tousiours.  Iusques  icy  nous  avons  prouve  par  suffisans  tesmoignages,  comme  les  ames  estans  separees  des  corps,  vivent  neantmoins  en  Dieu.  Et  avons  reprouve  l'erreur  des  Anabaptistes,  qui  font  a  croire  qu'elles  dorment,  estans  comme  mortes  sans  sentiment  aucun.  Maintenant  pour  satisfaire  au  desir  de  tous,  entant  qu'en  nous  est,  il  reste  d'exposer