58:122  qu'il  est  deplaisant  a  Dieu.  Sur  cela  il  fait  publier  son  edict,  Que  nul  n'ait  a  toucher  Isaac,  ne  sa  femme  a  peine  de  la  mort.  Voila  encore  une  chose  qu'on  prisera.  Il  semble  donc  qu'Abimelech  soit  du  tout  confit  en  crainte  de  Dieu:  mais  tantost  apres  il  dit  a  Isaac,  Sors,  retire-toy.  Il  chasse  Isaac  :  il  cognoist  qu'Isaac  est  sous  la  protection  de  Dieu:  et  quand  il  attente  rien  contre  lui,  n'est-ce  pas  comme  despiter  Dieu  et  violer  sa  sauvegarde  qu'il  a  mise  contre  son  serviteur?  Or  apprenons,  puis  qu'ainsi  est,  de  converser  tellement  entre  ceux  qui  n'ont  nulle  crainte  de  Dieu,  que  s'ils  nous  sont  humains  et  traitables  pour  un  temps,  et  que  puis  apres  il  y  ait  changement,  que  nous  le  portions  en  patience,  et  que  nous  soions  apprestez  de  souffrir  iniure  d'eux,  quand  ils  nous  auront  fait  du  bien.  Au  reste,  cognoissons  qu'il  faut  que  Dieu  ait  imprime  sa  crainte  en  nous,  et  qu'il  y  ait  donne  une  racine  vive:  ou  autrement  nous  n'aurons  ne  constance  ne  fermete.  Prions-le  donc  qu'il  lui  plaise  de  monstrer  par  effect  que  vraiement  il  nous  a  renouvelez  par  son  S.  Esprit,  et  que  nous  n'avons  point  un  zele  qui  soit  comme  un  feu  d'estouppe,  pour  s'esteindre  incontinent:  mais  que  nous  desirons  de  marcher  tousiours  en  obeissance,  et  d'y  persister  et  encore  que  nous  en  declinions,  selon  que  nous  sommes  infirmes:  toutesfois  que  ce  n'est  pas  pour  en  estre  debauchez  ne  divertis,  mais  que  nous  poursuivions  nostre  course  iusques  en  la  fin.  Et  ainsi,  nous  avons  a  le  prier,  que  de  iour  en  iour  il  nous  augmente  les  graces  de  son  S.  Esprit:  car  quelque  bon  desir  que  nous  eussions,  il  est  certain  que  nous  serions  tantost  refroidis:  et  comme  nostre  nature  est  volage,  du  iour  au  lendemain  nous  serions  changez,  n'estoit  que  Dieu  continuast  a  nous  gouverner.  Voila  donc  en  somme  ce  que  nous  avons  a  retenir.  Or  la  raison  qui  est  ici  amenee  par  Abimelech,  est  prise  de  l'experience  commune:  car  nous  savons  que  les  riches  mesprisent  les  povres  :  et  celui  qui  a  dequoy,  pense  que  les  autres  ne  sont  pas  pareils  a  lui:  la  dessus  il  sera  incontinent  enfle  d'orgueil,'  et  l'audace  et  la  cruaute  s'ensuivent:  comme  il  est  dit,  Que  les  hommes  sont  semblables  a  des  chevaux,  quand  ils  sont  trop  saoulez,  ils  sont  indoutables,  ils  regimbent,  ils  mordent:  ores,  on  n'en  peut  chevir.  Voila  comme  les  hommes  en  sont  coustumierement.  Or  donques,  quand  quelcun  aura  force  biens,  il  est  certain  que  il  sera  de  nature  enclin  a  s'eslever,  et  que  l'orgueil  dominera  en  lui.  Et  voila  mesme  comme  il  est  parle  de  Sodome.  Que  quand  il  y  a  eu  du  bien  tant  et  plus,  ils  se  sont  enorgueillis  :  et  puis  la  cruaute  est  survenue,  qu'ils  n'ont  point  eu  pitie  de  leurs  prochains,  pour  leur  subvenir.  Cela  est  quasi  ordinaire.  Ainsi  donc,  quand  Abimelech  dit  a  Isaac,  Tu  es  plus  fort  que  nous:  sors  donc,  et  te  retire:  cela  est  a,  cause  que  les  hommes  abusent  des  graces